Анатолий Павлов: «Модукка уонна Намҥа оскуолалар тутулла тураллар»

Нам улууһун баһылыгын э.т. Анатолий Павлов улууска тутуу үлэтин туһунан санаатын үллэстэр:

– Кэлиҥҥи сылларга Нам улууһугар тутуу үлэтэ тэтимнээхтик ыытыллан, дьон-сэргэ олоҕо биллэ тубуста. М.К.Аммосов аатынан култуура уонна духуобунай сайдыы дыбарыаһа үлэҕэ киирбитэ. Итиэннэ Нам киинигэр аныгылыы быһыылаах, бары ирдэбилгэ толору эппиэттиир кырдьаҕастар уонна инбэлииттэр интэринээт-дьиэлэрэ үлэҕэ киирдэ. Ону сэргэ саҥа эмтэнэр куорпус тирэх сыбаайата түһэн тутуу үлэтэ тигинэччи бара турар.

Хатырыкка М. К. Аммосов аатынан элбэх хайысхалаах култуура уонна успуорт киинэ тутуллан нэһилиэк олоҕо биллэрдик сэргэхсийдэ. Оттон Модут нэһилиэгэр 150 миэстэлээх, Нам сэлиэнньэтигэр 450 миэстэлээх оскуолалар тутулла тураллар. Маны таһынан, хас да нэһилиэккэ оҕо уһуйааннара тутулланнар, кэлэр кэскилбит үүнэр-сайдар кыаҕа улаатта.