Анатолий Семенов: «Илья Винокуров аата уонна үлэтэ-хамнаһа Саха сирин устуоруйатыгар хаалыаҕа»

Өрөспүүбүлүкэ күнүнэн СӨ Бырабыыталыстыбатын бэрэссэдээтэлин солбуйааччы Анатолий Семенов биллиилээх бэлитиичэскэй диэйэтэл Илья Егорович Винокуров пааматынньыгар сибэкки дьөрбөтүн уурда.

Саха норуотун чаҕылхай уола Илья Винокуров өрөспүүбүлүкэни сэрии ыар, репрессия уустук уонна сэрии кэнниттэн экэниэмикэни атаҕар туруоруу сылларыгар салайбыта. Анатолий Семенов бэлиэтииринэн, Илья Винокуров өрөспүүбүлүкэ сайдыытыгар уонна олохтоохтор олохторо-дьаһахтара тупсарыгар оҥорбут үлэтэ үгүс. Кини бүттүүн олоҕун өрөспүүбүлүкэ сайдыытыгар, атаҕар туруутугар анаабыт.

Ол курдук, бырамыысыланнастан саҕалаан үөрэх, наука, литературнай айар үлэ, доруобуйа харыстабылын эйгэтигэр барытыгар ылсан үлэлээбит. Оскуолалар, балыыһалар, сэллиги эмтиир санаторийдар о.д.а. социальнай эбийиэктэр тутуллан үлэҕэ киирбиттэр. Илья Егорович Винокуров аата сүҥкэннээх үлэтэ үйэ-саас Саха сирин устуоруйатыгар хаалыаҕа.