«Арассыыйа» быыстапкаҕа Уһук Илин уонна Арктика күнэ ыытыллыаҕа

Тохсунньу 24 күнүгэр Москваҕа ВДНХ-ҕа  «Арассыыйа» быыстапкаҕа Уһук Илин уонна  Арктика күнэ ыытыллыаҕа.  Дойду Аҕа  баһылыга Владимир Путин XXI үйэҕэ национальнай инники күөҥҥэ турар соругунан ыйбыт  эрэгийиэннэрин  сайыннарыыга туһуламмыт  араас тэрээһиннэр,  эспиэрдэр сиэссийэлэрэ, лиэксийэлэр ыытыллыахтара. 

Уһук Илин уонна  Арктика күнүн бырагыраамата хас да блоктан турар. Күнү үөрүүлээх быһыыга-майгыга арыйыы тэрээһинигэр РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев уонна РФ Уһук Илинин уонна Арктикатын сайыннарыы миниистирэ  Алексей Чекунков итиэннэ  федеральнай былаас уорганнарын бэрэстэбиитэллэрэ, эрэгийиэн баһылыктары кыттыахтара.

Пленарнай мунньахха уонна эспиэртэр сиэссийэлэригэр  кыттааччылар туһалаах баайы-дуолу хостооһун, балыктааһын,  логистика, нефтегазохимия, тутуу, туризм, космос уонна Хотугу муора суолун туһунан кэпсэтиэхтэрэ.   ВДНХ былаһааккатыгар Уһук Илиҥҥэ уонна Арктикаҕа саҥа бырайыактары олоххо киллэриигэ сөбүлэһиилэр түһэрсиллиэхтэрэ.

Уһук Илин уонна  Арктика күнүн иитинэн  каадырдары бэлэмниир  «Муравьев-Амурский 2030» бырагыраама үһүс түһүмэҕэ саҕаланыаҕа.

Уһук Илин уонна  Арктика күнүн түмүктүүр түһүмэҕэр   «Дружба народов»  фонтан таһыгар бырааһынньыктааҕы кэнсиэр буолуоҕа.