Арассыыйа Дьоруойа Николай Евдокимов уонна байыаннай дьайыы бэтэрээнэ Лена Макарова ХИФУ устудьуоннарын кытта көрүстүлэр

Бүгүн Арассыыйа Дьоруойа Николай Евдокимов уонна байыаннай дьайыы бэтэрээнэ Лена Макарова «Знание.Герои» бырайыак иитинэн М.К. Аммосов аатынан Хотугулуу-Илиҥҥи федеральнай университет устудьуоннарын кытта көрүстүлэр.

Тэрээһин «Знание.Герои» бырайыак чэрчитинэн ыытылынна уонна патриотизм, гражданскай эппиэтинэс, уопсастыба олоҕор хас биирдии киһи оруола диэн тиэмэҕэ ананна диэн «Аҕа дойдуну көмүскээччи» пуондатын Саха сиринээҕи салаата иһитиннэрэр.

Анал байыаннай дьайыы бэтэрээнэ Лена Макарова фроҥҥа сылдьан үлэлээбит уопутун, бааһырбыт байыастарга мэдиссиинэ көмөтүн оҥоруу уонна сулууспа ыарахаттарын туһунан кэпсээтэ.

Онтон «Аҕа дойдуну көмүскээччи» пуонда Саха сиринээҕи салаатын салайааччытын солбуйааччы Симона Томская «Честь наивысшая – носить русский мундир» диэн анал байыаннай дьайыы кыттыылаахтарын туһунан кинигэ хомуурунньугун үһүс таһаарыытын билиһиннэрдэ. Бу иннинэ «Жизнь за други своя» (2024 с. олунньу)  уонна «Нет уз святее товарищества» (2024 с. от ыйа) кинигэлэр тахсыбыттара. Бу таһаарыыларга анал байыаннай дьайыы кыттыылаахтарын дьиҥнээх бойобуой олохторун туһунан суруллар.

Анал байыаннай дьайыы дьоруойдара бэйэлэрин олохторун историятын, бойобуой уопуттарын туһунан кэпсээтилэр. Оттон устудьуоннар үгүс элбэх ыйытыыны биэрдилэр. Сулууспалыы сылдьан саамай өйдөөн хаалбыт түгэҥҥит, бу уопуккутуттан тугу өйдөөн хааллыгыт, уустук, тыҥааһыннаах кэмҥэ туттуллар сиэр-туом, итэҕэл туһунан ыйыттылар.

Дьоруой Николай Евдокимов устудьуоннарга чэгиэн туругу, чөл олоҕу, ыраас халлааны баҕарда.

«Кылаабынайа кыһаллан үөрэниҥ, талан ылбыт идэҕитин баһылааҥ. Тоҕо диэтэххэ, билигин Ийэ дойду сайдыытыгар үөрэх уонна үлэ эрэ дьиҥнээх патриотизмынан буолар», — диэтэ Арассыыйа дьоруойа.