Арассыыйа Дьоруойа  Николай Соболев байыаннай дьайыы бэтэрээннэрин кытары көрүстэ

Чурапчы улууһугар “Дойдуну көмүскээччилэр” пуонда Саха сиринээҕи салаатын социальнай сүрүннээччитин  көҕүлээһининэн Арассыыйа Дьоруойа, батальон хамандыыра, подполковник Николай Соболев байыаннай дьайыы бэтэрээннэрин кытары көрүстэ.

Николай Соболев төһө да солото суоҕун иһин, Е.А.Борисов аатынан улуустааҕы бибилэтиэкэ ааҕар саалатыгар көрсүһүүгэ бириэмэ булан кэллэ.

Байыаннай дьайыыларга кыттыбыт 9 бэтэрээн Арассыыйа Дьоруойун кытары биир остуолга олорон,  байыаннай доҕордоһуу, байыаннай дьайыы туһунан ахтан-санаан аастылар уонна дьоһун суолталаах социальнай боппуруостары дьүүллэстилэр.

Бэтэрээннэр байыаннай дьайыы кыттыылаахтарын уонна кинилэр дьиэ кэргэттэрин өйөөһүн тиэмэтин таарыйдылар уонна хорсун быһыы холобуругар үүнэр көлүөнэни иитии суолталааҕын ыйдылар. Николай Соболев хас биирдиилэрин болҕомтолоохтук иһиттэ, бэтэрээннэргэ сулууспаларын иһин махтанна уонна маннык көрсүһүүлэр үгэстэри салгыырга  олус суолталаахтарын бэлиэтээтэ.

«Буойуннар уопуттара быһаччы бэриллэн иһэрэ биһиэхэ улахан суолталаах. Маннык көрсүһүүлэр үгэстэри салгыырга уонна дойдуга сулууспалыырга күүһүн, олоҕун уурбут дьоҥҥо убаастабылы күүһүрдэргэ туһалыыллар”, — диэн тэрийээччилэр бэлиэтээн эттилэр.

Түмүккэ бэтэрээннэр Николай Соболевка сулууспатыгар ситиһиилэри баҕардылар уонна  көлүөнэр көрсүһүүлэрэ, кэпсэтиилэрэ салҕанарыгар эрэнэллэрин биллэрдилэр.

СӨ Ил Дарханын уонна бырабыыталыстыбатын пресс-сулууспата