Арассыыйаҕа байыастарга анаан сабыылаах мессенджер оҥордулар

Байыаннай сыалга анаан Арассыыйаҕа туспа мессенджер оҥордулар. Саҥа мессенджер ханна да кииннэммэт, биир да сервера уонна баазата суох үлэлиир.

Бырагырааманы билигин байыаннай дьайыы хонуутугар туһаналлар уонна байыастарга үчүгэй сэҥээриини ылла диэн «Известия» хаһыат иһитиннэрдэ.

Ол курдук, «Локтар» диэн хамаанда тус сыалаах бырагыраама оҥорон таһаарда.  Бырагыраама тактическай каарталаах уонна байыаннай мессенджердаах. Саҥа тиһик  геоданнайдары кытта атастаһарга уонна байыаннай балаһыанньаны кытта суһаллык үллэстэргэ кыах биэрэр.

«Интэриниэтэ эбэтэр серверэ суох үлэлиир бырагаама  олус наадалаах. Бу  араадьыйа ыстаансыйаларын кытта эбэтэр  анал тиэхиньикэ икки ардыларыгар баар байыаннай лииньийэнэн, сабыылаах Wi-Fi-бөлөҕүнэн  сибээс олохтуур», — диэн бырайыак бэрэстэбиитэлэ кэпсиир.