Арктика улуустарыгар «күөх рейстэр» көттүлэр

Саҥа дьыл иннинэ хотугу улуустарга фруктаны, оҕуруот аһын, араас бородуукталары тиэрдэр «күөх рейстэр»  тиийдилэр. Төһө да буурҕа  түстүн, бытарҕан тымныылар турдаллар, бырааһынньык иннинэ ас-үөл тиэрдиллэрин хааччыйыы сүрүн сорук буолар. 

«Айсен Николаев бырабыыталыстыбаҕа уонна «АТЛК» хампаанньаҕа, күн-дьыл усулуобуйата көҥүллүүрүн тухары, бородууксуйа Арктика улуустарыгар баар маҕаһыыннарга хойутаабакка тиэрдиллэригэр  үлэ тэтимин тутуһалларыгар сорудахтаата. Дойду барыта билигин Тиксиигэ балаһыанньаны кэтээн көрөр — онно күн-дьыл туруга чахчы кытаанах буолан, улахан хаар, күүстээх буурҕа түһэн, пилоттар уонна суоппардар таһаҕаһы тиэрдэллэригэр икки эрэ күннээхтэр. Аҕыйах күн чуумпурда. Онон бэҕэһээ 5 туонна хортуоппуйу, фруктаны,  бородууктаны сөмөлүөтүнэн Булуҥ оройуонугар Тиксиигэ ыыттылар», — диэн СӨ бырабыыталыстыбатын бэрэссэдээтэлин солбуйааччы Ольга Балабкина иһитиннэрдэ.

Бүгүн  Уус Куйгаҕа 5 туонна бородууктаны тиэммит өссө биир рейс ыытылынна. Рейси Чысхаан бэйэтинэн арыаллаата, алҕаата. Бүгүн күн иккис аҥаарыгар 3,8 туонна таһаҕас Абый улууһун Белай Гора сэлиэнньэтигэр ыытыллыаҕа.

Сарсын, ахсынньы 30 күнүгэр, Усуйаана оройуонун Уус Куйгатыгар, ону тэҥэ Аллараа Халыма улууһун Черскэй бөһүөлэгэр өссө биир рейс  ыытыллара былааннанар.

Ол курдук, уопсайа биэс «күөх рейс» тэриллиэҕэ. Хас биирдии рейс сибиэһэй хортуоппуйу уонна фруктаны илдьэр. Арктика улуустарыгар үүт бородууксуйата, сымыыт, куурусса, халбаһы эмиэ тиэллэр.