Арктика зонатын сайыннарарга инвестиция кээмэйин 5 төгүл улаатыннарыахтара

Ол туһунан Бырабыыталыстыба бэрэссэдэтээлин солбуйааччы Ольга Балабкина быһа эпииргэ иһитиннэрдэ.

Саха сирин Арктикатын зонатын сайыннарыы  дьоһун хайысхаларыгар  инвестиция кээмэйин, 2023 сылы кытта тэҥнээтэххэ, кырата 5  төгүл улаатыннарыы киирэр.

Ольга Балабкина санаппытынан, былырыын Ил Дархан Айсен Николаев Арктика зонатын сайыннарыы туһунан Ыйаах саҥардыллыбыт эрэдээксийэтин  бигэргэппитэ. «Докумуоҥҥа ураты болҕомто ууруллар:  “бастатан туран, олох хаачыстыбатын тупсарыы, социальнай инфраструктураны модернизациялааһын уонна табыгастаах эйгэни тэрийии уонна, биллэн турар¸инвестиция кээмэйин 2023 сыл таһымыттан кырата 5 төгүл улаатыннарыы”, — диэн Ольга Балабкина “Якутия 24” уонна “Саха” НКИХ ханаалларыгар быһа эпииргэ эттэ.

Арктиканы сайыннарыы туһунан Ил Дархан Ыйааҕа 2030 сылга диэри соруктаах. Эрэгийиэннээҕи бырабыыталыстыба   нэһилиэнньэ олоҕун тупсарарга чопчу көрдөрүүлэрдээх  соруктары туруорда.