Арсеньев аатынан «Уһук Илин» Бүтүн Арассыыйатааҕы литературнай бириэмийэ ахсыс сезона ыытыллар

Арсеньев аатынан бириэмийэ литературнай куонкуруһугар, бириэмийэ официальнай саайтарыгар тахсыбыт балаһыанньа быһыытынан, нууччалыы суруллубут уус-уран уонна документальнай проза айымньылардаах Арассыыйа уонна омук ааптардара кытталлар.

Бириэмийэ лауреаттара үгэс быһыытынан үс сүрүн номинациянан быһаарыллаллар: «Уһун проза», «Кылгас проза» уонна «Оҕолорго аналлаах проза». Ону таһынан, бириэмийэ чэрчитинэн «Уһук Илин сайдыытыгар киллэрбит кылаатын иһин» диэн анал номинация ыытыллар, диэн www.sakha.gov.ru иһитиннэрэр.

Арсеньев аатынан «Уһук Илин» Бүтүн Арассыыйатааҕы судаарыстыбаннай литературнай бириэмийэ РФ Бырабыыталыстыбатын Бэрэссэдээтэлин солбуйааччы – Арассыыйа Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутнев көҕүлээһининэн тэриллибитэ.

Бириэмийэ бастакы лауреаттара 2019 сыл ахсынньы ыйыгар «Уһук Илин эрэгийиэннэрин күннэрэ Москваҕа» иитэр-патриотическай тэрээһиннэр чэрчитинэн Арассыыйа култууратын пуондатын дьиэтигэр ааттаммыттара. В.К. Арсеньев аатынан «Уһук Илин» Бүтүн Арассыыйатааҕы литературнай бириэмийэ (16+) ахсыс сезона, үгэс быһыытынан, олунньу 1 күнүттэн сайаапканы тутууттан саҕаланна диэн бириэмийэ тэрийэр кэмитиэтигэр иһитиннэрдилэр.

Тэрийээччилэр Арассыыйа уонна атын дойдулар литературнай эйгэлэригэр киэҥник биллибит айар күрэх, Арассыыйа Уһук Илинин туһунан айымньылардаах элбэх ааптары бу сырыыга эмиэ түмүө диэн күүтэллэр.

Санатан эттэххэ, В.К. Арсеньев аатынан «Уһук Илин» Бүтүн Арассыыйатааҕы литературнай бириэмийэ тэрийээччитинэн «Социальнай көҕүлээһиннэри сайыннарар пуонда» тэрилтэ буолар. 2025 сыллаахха бириэмийэ тэрийэр кэмитиэтигэр 80 сайаапка киирбитэ. Сайаапканы РФ 15 эрэгийиэнин, Кытай Норуодунай Өрөспүүбүлүкэтин, Кэриэйэ Өрөспүүбүлүкэтин, Казахстаан Өрөспүүбүлүкэтин ааптардара ыыппыттара.

Арсеньев аатынан бириэмийэ сэттис сезонун уһун испииһэгэ (хас биирдии номинацияҕа 10-нуу айымньы) Х Илиҥҥи экэнэмиичэскэй пуорумугар (16+, балаҕан ыйын 3-6 күннэригэр Владивостокка ыытыллыбыта) билиһиннэриллибитэ.

Испииһэги АФ Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлин солбуйааччы, Арсеньев аатынан бириэмийэ тэрийэр кэмитиэтин бэрэссэдээтэлэ Григорий Куранов билиһиннэрбитэ. Сэттис сезон түмүктэрэ ахсынньы 5 күнүгэр Москваҕа, бириэмийэ үгэс буолбут партнерун – Арассыыйа култууратын пуондатын  былаһааккатыгар ыытыллыбыт үөрүүлээх быһыыга-майгыга (18+) таһаарыллыбыттара.