Атын эрэгийиэннэртэн 700-чэ баһаарынай кэлэн көмөлөһө сылдьаллар

Саха сиригэр ойуур баһаарын умуруорууга 1600 киһи, ол иһигэр анал идэлээх 700 баһаары утары охсуһааччы атын эрэгийиэннэртэн көмөҕө кэлбиттэр. Бу туһунан Айсен Николаев «Россия 24» ханаалга быһа эпииргэ кэпсээтэ.

Айсен Николаев 50 баһаары умуруорууга үлэ барарын эттэ. Атын баһаардар хонтуруолланаллар.

— 60-тан тахса баһаар хонтуруол зонатыгар, ол эрээри киһи кыайан тиийбэт ыраах сирдэргэ бааллар. Хайалаах сиргэ баһаары умуруорар кыаллыбат. Билигин 52 баһаары умуруорууга үлэ барар. Өрөспүүбүлүкэ соҕурууҥҥу-арҕаа өттүгэр, Иркутскай уобалас, Забайкальскай кыраай, Амурскай уобалаһы кытта кыраныыссалһар сирдэргэ ыксаллаах балаһыанньа үөскээтэ. Онно кураан, кураанах этиҥҥэ күн аайы саҥаттан саҥа умайыы күөдьүйэ турар, — диэн кини эттэ.

Ил Дархан сарсыардаттан 13 баһаары, ол иһигэр «Өлүөнэ очуостара» национальнай пааркаҕа номнуо умулларбыттарын туһунан эттэ. 5 саҥа баһаар көстүбүт.

Баһаары умуруорууга 1605 киһи уонна 77 тиэхиньикэ үлэлиир. Авиация үлэлиир. Авиа ботуруулга 20 салгын суудуната уонна “Авиалесоохрана” биэс  Ми-8 бөртөлүөтэ баһаары умуруорууга күүскэ үлэлии сылдьаллар.

Ил Дархан, бырабыыталыстыба пресс-сулууспата.