«Азия оҕолоро» норуоттар икки ардыларынааҕы оонньууларга бэлэмнэнии салҕанар

Эбийиэктэргэ баһаартан сэрэхтээх буолууну, санитарнай нуормалары тутуһууну уо.д.а. боппуруостары «Азия оҕолоро» норуоттар икки ардыларынааҕы спортивнай оонньуулары бэлэмнээһиҥҥэ уонна ыытыыга  тэрийэр кэмитиэт мунньаҕар дьүүллэстилэр.

Мунньаҕы СӨ Бырабыыталыстыбатын Бэрэссэдээтэлин солбуйааччы Сергей Местников ыытта.

Оонньууларга барыта 116 эбийиэк үлэлиир, итинтэн 11 саппаас. Хас биирдии эбийиэккэ хонтуруоллуур-киллэрэр пууннар, гражданнары уонна тырааныспары көрөр зоналар баар буолаллар. Аһыыр, тэрээһин ыытыллар, спортсменнар түһэр сирдэригэр ИДьМ аппараатын подразделениеларыттан уонна «Якутское» РФ ИДьМ МУ эппиэтинэстээхтэр сыһыарыллыахтара.

ГИДББ подразделениеларын анал былаанынан күрэхтэһиилэр ыытыллар сирдэригэр суолга куттал суох буолуута хааччыллыа, сүрүн уонна саппаас айан-сыры суоллара оҥоһуллубуттар, суолу сабарга уонна оптуобустары арыаллыырга боппуруостар көрүллүбүттэр.

Мэдиссиинэ отут пууна үлэлиэ, ол иһигэр тэрээһин кыттыылаахтара түспүт сирдэригэр 14 пуун түүннэри-күннэри үлэлиэҕэ. Оттон күрэхтэһиилэр ыытыллар сирдэригэр мэдиссиинэ 16 пууна күнүһүн үлэлиэҕэ.

Былааҥҥа сөп түбэһиннэрэн, эбийиэктэргэ бэрэбиэркэ ыытыллар, мэдиссиинэ көрүүтэ уонна вакцинация үлэлиэхтээх дьоҥҥо  уонна волонтердарга ыытыллар, Оонньуулар ыытыллар кэмнэригэр уо.д.а. хонтуруолу ыытарга лабораториялар уоттара-күөстэрэ көрүллэр.

Маны таһынан, мунньахха Оонньуулар кыттыылаахтарыгар сынньалаҥы тэрийии боппуруоһун дьүүллэстилэр. Биллэн турар, ыалдьыттарга улахан бырагыраама бэлэмнэниллэр. Холобур, «Юность» стадион утары болуоссакка, олимпийскай дэриэбинэҕэ, күн ахсын араас хабааннаах тэрээһиннэр ыытыллаллара былааннанар.  Ол курдук, кэнсиэр арааһа, фольклор биэчэрэ, караоке-бэстибээл, маастар-кылаастар, уо.д.а. Маны таһынан араас тиэмэлээх экскурсиялар ыытыллыахтара. Холобур, «Знакомство с Якутском», «Якутск музейный», «Экскурсия в мерзлоту» уо.д.а. болҕомтону тардыахтара.

Хас биирдии спортивнай хамаандаҕа сибээһи ыкса тутааччылар сыһыарыллаллар. Бу толорор былаас органнарыттан, тэрилтэлэртэн, уопсастыбаннай организациялартан бэрэстэбиитэллэр.

Дьүүллэһии түмүгүнэн Сергей Местников эппиэтинэстээх министиэристибэлэргэ, биэдэмистибэлэргэ логистиканы, Оонньуу кыттыылаахтарын аһылыктарын боппуруоһун, култуура уонна экскурсия былааннарын чочуйалларыгар, ситэрэллэригэр соруйда.

РФ Бэрэсидьиэнэ В.Путин «Азия оҕолоро» оҕо уонна ыччат успуордун эйгэтигэр биир саамай ситиһиилээх уонна интэриэһинэй бырайыак буоларын блиэтээбитэ. Бу былаһааккатыгар талааннаах, дьоҕурдаах уонна умсугуйан туран дьарыктанар оҕолору Арассыыйа эрэгийиэннэриттэн, араас дойдулартан түмэрин ыйбыта.

«Азия оҕолоро» норуоттар икки ардыларынааҕы спортивнай оонньуулар бэс ыйын 25 — от ыйын 7 күннэригэр ыытыллаллар. Барыта 239 кэмпилиэк мэтээл успуорт 24 көрүҥэр оонньонор. Тэрээһин түһүлгэтигэр 3,5 тыһ. тахса киһи, ол иһигэр 2,6 тыһ. кэриҥэ спортсмен кыттара күүтүллэр.

Быйыл өрөспүүбүлүкэ сиригэр-уотугар ыытыллар «Азия оҕолоро» аан дойдуга биллэр биир улахан күрэхтэһиинэн буолуоҕа. Күрэхтэһиигэ 24 дойду кыттыыны ыларын бигэргэттэ. Күрэхтэһии тыҥааһыннаах буолара күүтүллэр«, — диэн Ил Дархан Айсен Николаев «Быһа эпииргэ» бэлиэтээн турар.

СӨ Ил Дарханын уонна Бырабыыталыстыбатын пресс-сулууспата