«Азия оҕолоро» спортивнай оонньуулар билиэттэрэ атыыга тахсыахтара

«Азия оҕолоро» норуоттар икки ардыларынааҕы VIII спортивнай оонньуулар үөрүүлээх аһыллыыларын сиэригэр-туомугар  билиэттэри атыылааһын муус устар 26 күнүттэн саҕаланар.

Оонньуулар аһыллыылара Н.Н. Тарскай аатынан «Туймаада» стадиоҥҥа бэс ыйын 26 күнүгэр 19.00 чаастан ыытыллар.
Муус устар 26 күнүттэн   yakutsk2024.org саайтка билиэттэри  онлайн атыылааһын саҕаланар диэн «Азия оҕолоро» норуоттар икки ардыларынааҕы спортивнай кэмитиэт иһитиннэрдэ. Билиэт сыаната  2000 —  3500 солк.

Оонньуулар аһыллыыларын режиссера Руслан Тараховскай.

«Азия оҕолоро» норуоттар икки ардыларынааҕы спортивнай оонньуулар 1996 сылтан саҕалаан хас түөртүү сыл ахсын ыытыллаллар. Оонньуу сыала — оҕо, ыччат успуордун сайыннарыы уонна норуоттар икки ардыларынааҕы спортивнай бииргэ үлэлээһини бөҕөргөтүү. 2024 сылга бэс ыйын 25 күнүттэн от ыйын 7 күнүгэр диэри  VIII төгүлүн ыытыллар спортивнай оонньууларга, успуорт 24 араас көрүҥэр илин-кэлин түсүһүөхтэрэ.