Хаартыска -- Мэҥэ Хаҥалас улууһун дьаһалтатын пресс-сулууспата.
Бу күннэргэ Сэбиэскэй Сойуус Дьоруойа Федор Кузьмич Попов аатынан Баатара орто оскуолатыгар бастакы чоппуускалар күн сирин көрдүлэр.
Кулун тутарга Баатара оскуолатыгар саҥа сүүрээн быһыытынан «Рост» агролаборатория аһыллан, оҕолор гидропоникаҕа кылгас кэм иһигэр күөх үүнээйини, оҕурсуну үүннэрэн, бастакы астарын ылбыттара.
Лаборатория олоххо киириитигэр «Саха сиригэр гражданскай көҕүлээһиннэри өйүүр уонна сайыннарар биир кэлим ресурснай киин» пуондата уонна баатаралар биир дойдулаахтара, СӨ баһылыга кыттыылаах сайдыылаах уонна үтүө туруктаах буолуу Сэбиэтин чилиэнэ Людмила Николаева улахан күүс-көмө буолбуттара. Агролаборатория үөрүүлээх арыллыытыгар Людмила Валерьевна оҕолор эбии үөрэтэр-чинчийэр хайысхалара кэҥээтин диэн Ил Дархан Айсен Николаевтынн инкубатордары уонна сымыыттары бэлэх ууналларын туһунан иһитиннэрбитэ. Муус устар саҕаланыытыгар Дьокуускайдааҕы көтөр фабрикатын сымыыттарынан толору хаачыллыбыт икки 70-наах уонна биир 20-лээх инкубатордар оннуларын булан, күн бүгүн номнуо бастакы чоппуускаларын таһаардылар.
Оскуола дириэктэрэ Геннадий Макаров, интэринээккэ иитээччинэн үлэлиир Софрон Винокуров көтөрдөрү инкубатордаан таһаарарга Дьабыылга баһылык гранын ылары ситиһэн, көтөр пиэрмэтин бэрт ситиһиилээхтик үлэлэтэ турар Лариса Ивановаҕа баран үөрэммиттэрэ. Билиилэрин бырайыак салайааччытыгар, алын сүһүөх учууталыгар Александра Матвееваҕа тиэрдэн, үөрэнээччилэр күннэтэ көрөн-истэн, кэлбит сымыыттартан 80%-нын таһааран, аһатан-сиэтэн сап-саһархай көп түүлээх кырачаан чоппуускалары атахтарыгар туруордулар. Бу үлэ тиһигин быспакка, инкубатордар салгыы үлэлииллэригэр диэн, улуус салалтата Москва куораттан 160 бройлернай куурусса сымыытын сакаастаан ыллаттаран, оскуолаҕа тиксэрдэ. Сайыҥҥы сынньалаҥ кэмигэр иитэллэригэр, үөрэтэр чинчийэр үлэни ыыталларыгар
чоппуускалары оскуола оҕолоругар аһыыр бурдуктарын, битэмииннэрин кытта түҥэттилэр. Ону тэҥэ, нэһилиэк баҕалаах олохтоохторугар бэлэх ууннулар. Саҥа кэлбит бройлернай кууруссалар сымыыттарын инкубатордаан таһааралларыгар 6-8 кылаас үөрэнээччилэригэр куонкурус биллэрбиттэр. Куонкуруһу кыайбыт икки оҕо салгыы көрөн-истэн, бырайыагы иилээн-саҕалаан ыыталларыгар кыах бэриллэр.
Бу туһунан Мэҥэ Хаҥалас улууһун дьаһалтатын пресс-сулууспата бэйэтин телеграм-ханаалыгар иһитиннэрдэ.
Саха Өрөспүүбүлүкэтин Судаарыстыбаннаһын күнүгэр, балаҕан ыйын 27 күнүгэр, 19:00 чаастан Ил Дархан Айсен Николаевы кытта…
Дьокуускайга ПСБ баан Саха Өрөспүүбүлүкэтигэр аан бастаан ыытыллыбыт “ЭтноРан.ЯКУТИЯ 2025” спортивнай-култуурунай сүүрүүнү өйөөн, тэрээһин анал…
ЫБММ пресс-сулууспата иһитиннэрбитинэн, балаҕан ыйын 17 күнүгэр түүн 02:13 ч. баһаарынай-быыһыыр сулууспаҕа Горнай улууһугар Аһыма…
Бүгүн, балаҕан ыйын 18 күнүгэр, куорат үрдүнэн быстах кэмҥэ өрөмүөн үлэтэ буоларынан сибээстээн, күн устата…
Бүгүн, балаҕан ыйын 18 күнүгэр, Үөһээ Дьааҥы, Өймөкөөн, Өлөөн, Мииринэй, Эдьигээн оройуоннарыгар инчэҕэй хаар түһэрэ…
Өлүөнэни туоратар муостаны тутуу бигэргэммит кыраапыгынан ыытыллар. Генеральнай бэдэрээтчит уонна бэдэрээтчит тутар-таҥар үлэ комплексын хааччыйаллар.…