“Байанай күрэҕэ” сэргэхтик ааста

Аҕыйах хонуктааҕыта Булуҥҥа Саха сиригэр Уол күнүгэр, Арассыыйаҕа дьиэ кэргэн сылыгар аналлаах Намыы нэһилиэгин тэрилтэлэрин икки ардыгар “Байанай күрэҕэ” ыытылынна.

Бороҕон нэһилиэгин “Омолой” култуура киинэ уонна “Синкэн” община тэрийдилэр. Күрэхтэһии саҕаланыытыгар эдэр чөмпүйүөн табаһыт Колесов Вячеслав Альбертовиһы чиэстээтилэр.  Кини Эбээн Бытантай оройуонугар ыытыллыбыт таба сүлүөтүгэр  сыарҕалаах табанан 5 км, 10 км сүүрдүүгэ, комбинированнай эстафетаҕа кыайан, 3 “буран” хаһаайына буолла. Дьиэ кэргэнэ Булуҥ оройуонугар Намыыга олороллор. Кини соторутааҕыта дьонугар кэлбитэ.

Түгэнинэн туһанан кинини нэһилиэк дьоно чиэстээтибит. Эбэтэ Старостина М.С алҕаата, алгыстаах алаадьынан күрэхтэһии кыттыылаахтарын күндүлээтэ.Тэрилтэ салайааччылара эҕэрдэлээтилэр уонна сэмэй бэлэхтэрин туттардылар. Вячеслав эһэтэ, эбэтэ, аҕата, ийэтэ — удьуор табаһыттар. Кини кыра эрдэҕиттэн ыстаадаҕа сылдьан дьонуттан элбэххэ үөрэммитэ. Онон аҕатын Альберт Владимирович аҕа ууһун общинатыгар  ситиһиилээхтик табаһытынан үлэлиир.

Слава 27 саастаах, кэргэннээх, оҕолоох. Вячеслав эргиччи талааннаах дьоҕурдаах уол. Бу бырааһынньык уол оҕону иитии улахан суолталааҕын көрдөрөр, дьиэ кэргэн төрүт үгэһин сайыннарар. Ону биһиги табаһыт уолбут холобуругар көрөбүт, киэн туттабыт.

Ол кэннэ күрэхтэһиибит саҕаланна. “Байанай” күрэхтэһиигэ 20 эр бэрдэ күөн көрүстүлэр, түөрт тэрилтэ хамаандата кытынна: ОДьКХ (сал. Бурцев Н.В.), ДЭС (сал. Бурцев А.Н.), орто оскуола (сал.Софронеева А.Р.), “Кэнчээри” уһуйаан (сал.Рожина Ф.Х.).

Кыттааччылар “Биир киһи — барыбыт туһугар, бары — биир киһи туһугар” диэн девиһи тутустулар.

Онон кутаа уотугар чэй оргуттулар, буранынан сүүртүлэр, эстэпиэтэҕэ “буран” сыарҕатын соһон сүүрдүлэр, хаарынан сыылыннылар, сүүс миэтэрэҕэ булчут хайыһарын кэтэн суурдүлэр, куул кэтэн ыстаннылар. Ону тэҥэ дартс быраҕыыга холоннулар, кыыһы эккирэттилэр, аптамаат сааны хомуйдулар, тоҥуу хаарынан сүүрдүлэр. Ыраахха хаатыҥканы быраҕыы, тон балыгы кыһыы, хомуур хапсаҕайа, чуурка хайытыыта, “Өһөс торбос” дьон сэҥээритин ыллылар.

“Кыыһы эккирэтии” түһүмэххэ 11 кылааска үөрэнэр быһый кыыс Кривошеева Алеся сүүрдэ.

Кыттааччылар көхтөөхтөрүн уонна бэлэмнээхтэрин көрдөрдүлэр.

Күрэхтэһии түмүгүнэн хас биирдии кыттаачыга барыларыгар сыаналаах бириис туттарылынна:

1 миэстэни ылбыт оскуола хамаандатыгар (хапытаан Шадрин С.С) электрическэй шуруповеры туттардылар. ДЭС хамаандата (хап. Бурцев А.Н.) иккискэ тахсан,  инструменнар нобуордарын ылла. Үһүс миэстэлээх ОДьКХ хамаандата (Бурцев В.Н) походнай палаатканан наҕараадаланна.

“Кыайыыга дьулуурун иһин” бириискэ “Омолой” култуура киинэ, “Кэнчээри” уһуйаан хамаандата (хап. Кыняхыров А.В.) тигистилэр.

Күрэхтэһиигэ нэһилиэк биир бастыҥ эдэр ыччата, “Бороҕоннооҕу” МУП бэтэринээрэ Старостин Софрон Николаевич, успуорт бэтэрээнэ, тустууга успуорт маастара Стручков Алексей Христофорович,  чөл олоҕу тутуһааччы, успуорт бэтэрээнэ Бурцев Петр Николаевич, Находкина Р.В., Старостина Н.Н., Дьячковская М.Я. судьуйалаатылар.

Күрэхтэһиини тэрийсибит, күүс-көмө буолбут дьоммутугар барыларыгар махтанабыт. Чуолаан, мас тиэйбит Старостин Илья Ивановичка, балыгынан хааччыйбыт Бурцев Василий Николаевичка, успуорт тэриллэрин уларсыбыт Щадрин Сергей Сергеевичкэ, тырааныспарынан хааччыйбыт Кыняхыров А.В уонна Бурцев П.Р.

Онон дьон биһирэбилин ылбыт бэртээхэй тэрээһин буолан ааста.

И. Бурцева, тэрийэр кэмитиэт бэрэссэдээтэлэ.

Хаартыскалары: И.Бурцева тиксэрдэ.