Байыаннайдар уоппускаларын кэмигэр балыыһаҕа уочарата суох көрдөрүнэр кыахтаахтар

РФ Оборуона миниистирэ Андрей Белоусов дойду баһылыга Владимир Путиҥҥа уоппускаларыгар сылдьар анал байыаннай дьайыы кыттыылаахтарын гражданскай балыыһа өҥөтүнэн хааччыйар туһунан этиини киллэрдэ.

Саха Өрөспүүбүлүкэтин Ил Дархана Айсен Николаев бэлиэтээбитинэн, анал байыаннай дьайыы саҕаланыаҕыттан Саха сириттэн кыттар байыастар уоппускаларын кэмигэр өрөспүүбүлүкэ бары балыыһаларыгар уонна Москваҕа «Бэс Чагда» санаторийга доруобуйаларын туругун көннөрүнэр кыахтаахтар.

«Өрөспүүбүлүкэ бары оройуоннарыгар анал байыаннай дьайыы кыттыылаахтарыгар уочарата суох уонна босхо көрдөрүнэр кыах баар. Маннык өҥөнөн 2000 кэриҥэ байыас туһанна. Ону сэргэ 347 анал байыаннай дьайыы кыттыылааҕын дьиэ кэргэнин чилиэнэ «Бэс Чагдаҕа» санаторнай-курортнай эмтэниини ааста»,– диэтэ Айсен Николаев. Анал байыаннай дьайыы эйэлээх олохтоохторугар Саха сирин быраастара тиһигин быспакка көмөнү оҥороллор.