Байыаннай эпэрээссийэ кыттыылаахтарын оҕолоро оробуочай идэлэргэ үөрэнэллэр

Идэҕэ урутаан бэлэмниир киин байыаннай эпэрээссийэҕэ кытта сылдьар дьон 9-11-с кылааска үөрэнэр оҕолорун босхо оробуочай идэлэргэ үөрэтэр. Үөрэх Ил Дархан Айсен Николаев гранын олоххо киллэрии бырагырааматын иитинэн барар.

“Билигин өрөспүүбүлүкэҕэ баар 19 үөрэтэр кииҥҥэ 26 оҕо босхо оробуочай идэлэргэ үөрэнэ сылдьар. Күн бүгүн 40 оҕо идэҕэ бэлэмнэниини ааста. Өссө сүүсчэкэ оҕо идэҕэ эрдэттэн бэлэмнээһин туһаайыытын ааһара былааннанар” – диэн СӨ Идэҕэ урутаан бэлэмниир киин дириэктэрэ Владислав Хабаров иһитиннэрэр. Оҕолор суоппартан сыбаарсык идэтигэр тиийэ босхо үөрэнэр кыахтаахтар.

Оҕолорун бырайыакка кыттыннарыан баҕалаах төрөппүттэр Дьокуускай куоракка Идэҕэ урутаан бэлэмниир кииҥҥэ (ЦОПП) бу аадырыска тиийэллэрэ ирдэнэр: Крупская уул. 13-с нүөмэрдээх дьиэтэ, 1 мэндиэмэн. Үөрэххэ Идэҕэ урутаан бэлэмниир киин саайтыгар сурутуохха сөп: https://copp14.ru/. Бу туһунан Ил Дархан уонна Бырабыыталыстыба пресс-сулууспата иһитиннэрэр.