Байыастар Улуу Кыайыы күнүн уруйдууллар

Ыам ыйын 9 күнүгэр Улуу Кыайыы 80 сылыгар уонна олохторун толук уурбут байыастары кэриэстээн анал байыаннай дьайыы хонуутугар сэргэ туруордулар.

«Кыайыыны чугаһатан БАРС «Боотур» 2-с этэрээтин байыастара байыаннай дьайыы хонуутугар саха төрүт үгэстэригэр сүгүрүйэн, көлүөнэлэр икки ардыларыгар сибээһи олохтуурга уонна  көҥүл дойду, тутулуга суох буолуу иһин олохторун толук уурбуттар байыастары кэриэстээн сэргэ туруордулар», — диэн Кэбээйи улууһун баһылыга, байыаннай дьайыы кыттыылааҕа Иван Левин суруйар. Бу туһунан «ЯКУТИЯ: ВСЁ ПРО СВО» ТГ-ханаал иһитиннэрэр.

«Историяҕа суруллубутунан, Аҕа дойду Улуу сэриитин кэмигэр хайыһар биригээдэтэ 150-с стрелковай дивизия чилиэттэринэн буолбуттара диэн этиллэр. Бу биригээдэлэр уустук тургутууну ааспыттара. Кинилэр Ильмень күөл эпэрээссийэтигэр кыттыбыттара уонна 1945 сыллаахха ыам ыйын 1 күнүгэр Рейстахха Кыайыы былааҕын көтөҕөр үрдүк чиэскэ тиксибиттэрэ. Сэрии бүтүүтэ дивизия кэккэтиттэн аҕыйах байыас хаалбытын үрдүнэн, кинилэр тыыннара салҕанар. Бүгүн 150-с гвардейскай мотострелковай дивизия добровольнай батальонугар «Барс-2» уонна «Барс-22» батальоннарга сүүһүнэн саха буойуннара сулууспалыыллар. Бу сэрии толоонугар байыаннай холбоһуктаынан эрэ буолбакка, өбүгэлэрин үгэстэрин салҕааһынын көрдөрөллөр. Маны сэргэ Кыайыы күнүгэр сэргэ туруоруута — историяҕа, төрүт култуураҕа сүгүрүйүү уонна ытыктабыл бэлиэтэ. Бу Аҕа дойду көмүскэлигэр охсуспут дьону үйэтитии эрэ буолбакка, көлүөнэлэр икки ардыларыгар сибээһи олохтуур — Илмень күөлтэн Берлиҥҥэ диэри тиийбиттэртэн, Ийэ дойдуну аныгы көмүскэччилэригэр тиийэ. Бүгүн Кыайыы күнэ өстөөҕү өрөгөйдөөх кыайыытын бырааһынньыгынан эрэ буолбакка, көлүөнэлэр үгэстэри уонна утумнары сүгүрүйүүлэрин күнүнэн буолар», — диэн Иван Левин иһитиннэрдэ.

Санатахха, былырыын Кэбээйи улууһун баһылыга Иван Левин, Муома улууһун дьаһалтатын салайааччыта Дмитрий Аммосов и Аллараа Халыма улууһун баһылыга Валерий Сентяков баҕа өттүнэн байыаннай дьайыыга сулууспалыы барбыттара.