Байыастарга 140-тан тахса баһыылка тиэрдилиннэ

Саха сириттэн нэдиэлэ устатыгар ДНӨ, ЛНӨ уонна Курскай уобаласка сылдьар байыастарга 140-тан тахса аадырыстаах баһыылка тиэрдилиннэ.

Бу туһунан «Юстас» позывнойдаах тирэх пуун сүрүн координатора иһитиннэрдэ.

«Мэхээнньиктэр бөлөхтөрө икки «Фермер» УАЗ массыынаны өрөмүөннээтилэр, хас да «Якт-Сокол» квадроциклы стройга төннөрдүлэр. Сыл устата биһиги мэхээнньиктэрбит 120-тэн тахса көлөнү оҥорон бэлэмнээтилэр«, — диир «Юстас».

Тирэх пууннар бу күннэргэ  «Сахамедиа» военкордарын уонна Хаҥалас улууһун оробуочай бөлөҕүн байыаннай дьайыы сиригэр-уотугар үлэлииллэрин хааччыйдылар диэн тирэх пууннар сүрүн координатордара эттэ.

Кини Саха сирин тирэх пууннарын үлэһиттэрэ Саҥа дьылга диэри Ил Дархан бэлэхтэрин тиэрдэргэ үлэлэһиэхтэрэ диэн иһитиннэрдэ.

СӨ Ил Дарханын уонна Бырабыыталыстыбатын пресс-сулууспата