Банаантан уойаллар, кофеттан кырдьаллар?

Синньииргэ дьулуһар дьон киэһэтин банааны сииртэн туттуналлар. Элбэх калорийдаах, киһини уотуон сөп диэн бу фруктаны сарсыарда өттүгэр сии сатыыллар.

Оттон миэдиктэр быһаарбыттарынан, банаан калий, С битэмииннээх уонна элбэх клетчаткалаах буолан элбэх калорийа суох эбит. Банаан аһы туттунарга, хонтуруоллуурга көмөлөһөрүн бэлиэтээбиттэр.

Оттон кофе киһи этин-сиинин кырытыннарар, сүрэххэ дьайыыта суох дииллэрэ чахчы дуо? Күҥҥэ биир-икки чааскы оргутуллубут дьиҥнээх кофены иһии (бороһуок буолбатах) киһи доруобуйатын эмсэҕэлэтэр кыаҕа суоҕун быраастар этэллэр. Кофе киһи этин-сиинин харыстыыр антиоксиданнардаах буолан иһиэххэ сөп эбит.  Ол эрээри хаһан баҕарар кофены күн бастакы аҥаарыгар иһэри сүбэлииллэр.