Маҥнайгы кылааска киирэр оҕоҕо ханнык быһыылар булгуччулаахтарый?

Маҥнайгы кылааска киириэн иннинэ оҕоҕо АКДС, КПК, В гепатиттан уонна полиомиелиттан быһыы оҥоһуллубут буолуохтаах, диэн РИА Новости Роспотребнадзор пресс-сулууспата иһитиннэрдэ.

Үөрэх дьыла саҕаланыаҕыттан оҕолор кылаастарыгар алтыһыылара араас вирус уонна инфекция тарҕанарыгар төрүөтүнэн буолар. Ыар ыарыылартан көмүскэнэр сыалтан быһыы национальнай халандаара оҥоһуллубута, диэн пресс-сулууспаҕа бэлиэтээтилэр.

«Бастакы кылааска киириэх иннинэ ханнык быһыылар оҥоһуллубут буолуохтаахтарый:

• АКДС (коклюш, дифтерия, столбняк) — кырата түөрт быһыы;
• В гепатиттан — үс быһыы;
• Куор, паротит, краснуха — икки быһыы;
• Полиомиелиттан — алта быһыы.

Ону таһынан, сыл аайы туруоруллар кирииптэн быһыыны умнумаҥ», — диэн Роспотребнадзорга иһитиннэрдилэр.

Биэдэмистибэҕэ быһыы болдьоҕун уонна иммунопрофилактиканы тутуһарга сэрэттилэр. Өскөтүн кылааска оҕо үксэ быһыылаах буоллаҕына — кэлэктиибинэй иммунитет үөскүүр. «Сорох быһыылар национальнай халандаарга киирбэттэр, ол эрээри оскуола үөрэнээччилэригэр барыларыгар оҥотторорго сүбэлииллэр. Кинилэр истэригэр:

• Менингококковай инфекцияттан — бигэ иммунитет үөскүүрүгэр биир быһыы;
• Ветряная оспа утары быһыы — 1-1,5 ый быысаһан икки быһыы;
• А гепатиттан — 6-12 ый быысаһан икки быһыы», — диэн пресс-сулууспаҕа быһаардылар.