Аан бастаан оскуола боруогун атыллаан, маҥнайгы кылааска үөрэнэ киирбиппин субу баардыы өйдүүбүн.
Бастакы учууталбыт Алексеева Христина Афанасьевна биhигини бырааhынньыктааҕы линейка кэнниттэн кылааспытыгар киллэрэн паарталарга олордуталаабыта.
Үөрэнэр кылааспытыгар “Мы — внучата Ильича”, “Октябрята” диэн быраабылалар учууталбыт илиитинэн оҥоhуллан ыйаммыттар этэ. Үөрэхпитинэн куоталаhыы табылыыссата баара, сапка иилиллибит уруhуйдаммыт кумааҕы аракыаталаах. Ким үчүгэй сыананы ылбыкка ол аракыатаны сабынан сүүрдэллэрэ. Учууталым хас нэдиэлэ аайы саҥаттан саҥа араас өҥнөөх көстүүмү, ойуулаах булууhалары кэтэрин өйдөөн көрөөччүбүн. Кини уруокка хайдах биhигини үөрэтэрин, туттарын-хаптарын көрөн, дьиэбэр кэлэн учууталлаах оонньуурум.
Үөрэх саҕаланнаҕына күhүн оҕолор, оскуола үлэhиттэрэ бары чугас ойуурга отоннуу тахсарбыт. Биhиэхэ интэринээт куруускаларын туттаран, ким хаста куруускатын толорбутун ааҕан куоталаhарбыт. Элбэҕи отоннуу сатаан түргэнник хомуйа сатыырбыт.
Бастакы кылааска сэтинньи ыйга октябренокка киирбиппит. Учууталбыт биhиэхэ быраабылалары үөрэттэрбитэ, ырыа ыллаабыппыт. Быраабылалары нойосуус эрэ үөрэтэн туттардаххытына октябренокка киирэҕит диэн буолбута. Ол иhин бары кыhаллан үөрэппиппит.
Иккис кылааhы бүтэрбит сайыммар үлэ-сынньалаҥ лааҕырыгар сылдьыбытым. Онно салайааччынан учууталларбыт Христина Афанасьевна, Варвара Леонтьевна уочаратынан салайаллара. Лааҕырга үлэбит диэн, лабыкта хомуйуу, сороҕор сэбирдэх тууруу, былах быhыы. Үксүн лабыкта хомуйааччыбыт, ким хас куулу хомуйбутун суруйааччылар. Бары биир сиргэ мунньан улахан кууча диэччибит. Учууталбыт минньигэс борщ дуу, рассольник дуу миинин буhаран эбиэккэ ыҥырара. Онно Христина Афанасьевна оҕолорго айылҕаҕа, ойуурга хайдах сылдьыллыахтааҕын туһунан, урукку үһүйээннэри да кэпсиирэ. Лааҕыр бүтэригэр улахан “Костер” диэн тэрээhин буолара, онно оонньуу арааhын оонньотоллоро.
Үһүс кылааска үөрэнэ сырыттахпына, учууталым Христина Афанасьевна “Бэлэм буол” хаhыакка сурук суруйтарбыта, бииргэ үөрэнэр кыыhым Николаева Света ырыаhыт талааннааҕын туhунан. Ол суругум “Бэлэм буол” хаhыакка бэчээттэнэн тахсыбытыттан олус үөрбүтүм. Оскуолаҕа үөрэнэ сылдьан, ол биирдэ эрэ хаhыакка суруйбуттаах-
пын. Урут алын кылаас учуутала оҕолорго барытын бэйэтэ үөрэтэрэ: муусуканы, физкултуураны. Ол саҕана Сэбиэскэй Сойуус 15 өрөспүүбүлүкэлээх, онон украинскай, узбекскай, татарскай, грузинскай үҥкүүлэри анаан таҥас тиктэрэн үҥкүүлээччибит.
Үөрэх дьыла түмүктэннэҕин аайы оскуоланан ыhыахтыырбыт. Христина Афанасьевна учууталлыырын таһынан оскуола дириэктэринэн эмиэ үлэлээбитэ. Онон араас тэрээһиннэри тэрийэн, оҕолорго наҕараадалары туттартыыра. Мин сүүрүүгэ I миэстэни ыларым, кыhыл лиэнтэ кэтэрдэллэрэ, сүрдээх улахан мүhэ эт туттараллара. Дьиэбэр кыайыылаах киhи тиийэрим.
Оҕо сааспар умнуллубат түгэннэри хаалларбыт, билиини биэрбит, сырдыкка-кэрэҕэ уhуйбут бастакы учууталбар Христина Афанасьевнаҕа, үөрэммит оскуолабар истиҥник махтанабын. Учууталым угуйбут идэтигэр ситиһиилээхтик үлэлии сылдьарбар уһуйбут учууталбар барҕа махталбын этэбин!
Людмила Тарасова,
М. А. Алексеев аатынан Баппаҕаайы оскуолатын
үрдүкү категориялаах алын кылааһын учуутала.
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…
Дьокуускайга Эргэ куорат биир дириҥ устуоруйалаах, мааны, сэргэх, сырдык оҥоһуулаах оройуонунан биллэр. Манна киһи күнүстэри,…