Бээди бэтэрээннэрин чаҕылхай ситиһиилэрэ

Уус Алдан улууһугар Дүпсүн кытыы турар кыра бөһүөлэк.

Мантан төрүттээх олох киэҥ аартыгар тахсыбыт дьоннорунан биһиги киэн туттабыт. Кинилэр ортолоругар учуонайдар, спортсменнар, спорт бэтэрээннэрэ бааллар.

Олортон икки биир дойдулааҕым туһунан түгэнинэн туһанан ааҕааччыларга кэпсииргэ сананным. Бу сылга киирэн баран, кинилэр өрөспүүбүлүкэҕэ бэтэрээннэргэ чэпчэки атлетикаҕа күрэхтэһэн бэйэлэрин саастыылаахтарыгар бастакы миэстэни эрэллээхтик ыллылар.

Бээдигэ төрөөн-үөскээн улааппыт, билигин Нам улууһугар олорор Готовцев Василий Васильевич (ааспыт сыл бүтүүтэ бу хаһыакка сырдаппыт биир дойдулааҕым-аапт.) бу күннэргэ өрөспүүбүлүкэҕэ бэтэрээннэргэ бэйэтин саастыылаахтарыгар эмиэ бастаата. Эмиэ диирим оруннаах. Кини бу иннинэ хаста даҕаны бастаталыы сылдьыбыта. Онон элбэҕи эппэккэ, кини бу сырыыга хайдах күрэхтэһэн бастакы миэстэни ылбытын билиһиннэриэм.

Чэпчэки атлетика аан дойдутааҕы федерациятыгар бэтэрээннэргэ быраабыла быһыытынан сааһынан арахсан сүүрүүгэ аналлаах коэффициеннары тутталлар. Холобур, бэйэҕиттэн саастаах киһини кыайарга онно сөптөөх үчүгэй бириэмэни көрдөрүөхтээххин. Дьэ ити быраабыла быһыытынан, Василий төһө даҕаны биир да киһини иннигэр түһэрбэккэ кэллэр, 3000 м иккис миэстэ буолан хаалар. Онтон салгыы күрэхтэһэн 1500 м эрэллээхтик бастыыр.

Василий бу икки кэрчик сүүрүүлэргэ көрдөрбүт бириэмэтин ааҕааччы болҕомтотугар аҕалабын. 3000 м 10 мүн. 09 сөк. кэлбит. Ол аата 1 километры 3 мүнүүтэ 23 сөкүүндэнэн. Онтон 1500 м. 4 мүнүүтэ 51 сөкүүндэ. Мин бэйэм сааспар бу үчүгэй көрдөрүү диир Василий.  Онон муҥутуур кыайыылааҕы быһаарыыга 3 км 82,6 . Онтон 1500 м 88,63 ылан, уопсайа холбоон 171,23 баалланан бастакы миэстэни ылар.

Аны иккис биир дойдулааҕым Бочкарев Андрей Захарович диэн, эмиэ успуорт диэн баран муннукка ытаабыт саха уолана буолар. Андрей бэтэрээннэргэ бэйэтин саастыылаахтарыгар икки көрүҥҥэ эмиэ бастаата. Уһуну ойууга уонна ыстаҥаҕа.

Андрей куоракка көһөн кэлэн олохсуйбута ыраатта. Кылгастык эттэххэ, кини туһунан суоллаах-иистээх, эмиэ Василий курдук эт-хаан өттүнэн төгүрүччү сайдыылаах, элбэх араас дьарыктаах эр бэрдэ, саха саарына. Кини спортивнай олоҕун бэйэтэ сөбүлэстэҕинэ кэлин сиһилии сырдатыам.

Василийдаах Андрей манан тохтоон хаалбакка,  өссө да тус бэйэлэринэн чөл олох холобура буоланнар салгыы күрэхтэһэр былааннаахтар. Кинилэри кытары сөбүлэһэн туран, мин аҕа табаарыс уонна успуорт бэтэрээнэ буоларым быһыытынан, тус олохторугар уонна успуортка ситиһиилэри баҕарабын.

Иван Сивцев — Бээди

Хаартыскалар ааптар тиксэриилэрэ