Бээдигэ өссө биир үөрүүлээх түгэн тосхойдо

Кытыы сиргэ баар кыра бөһүөлэктэри өйүүр сыаллаах бырагыраама чэрчитинэн уонна олохтоох нэһилиэнньэ, нэһилиэк салалтатын өр кэмнээх туруорсуутунан, биэлсэр-акушер пууна бу сылга үбэ-харчыта быһаарыллан, үөрүүлээх быһыыга-майгыга акылаата түһэрилиннэ.

Онон Бээди олохтоохторо сэргэхсийэн, үөрэн-көтөн олороллор. Уһаппакка кылгастык эттэххэ, киинтэн тэйиччи сытар бөһүөлэктэргэ маннык биэлсэр-акушер пууннара бааллара булгуччулааҕын күннээҕи олохпут көрдөрөр.

Бу үөрүүлээх күн олохтоохтор тутуу барыахтаах сиригэр түмсэннэр аал уоттарын аһаттылар, алгыстарын эттилэр. 73 саастаах уонна билигин да эдэрдии эрчимнээхтик үлэлии сылдьар, бары ытыктыыр биэлсэрбит Мария Николаевна Нафанаилова алҕаата. Түгэнинэн туһанан эттэхпинэ, кини туһунан ааҕааччыларым болҕомтолоругар таһаарыам диэн эрэнэбин. Дьиҥнээх Үлэ Дьоруойдара кинилэр, ытык дьоммут буолаллар. 40 тахса сыл устата дьон олоҕун туһугар турууласпыт биһиги биэлсэр Маайыспыт курдук үтүөкэн дьонунан киэн туттабыт!

Иван Сивцев-Бээди

Хаартыскаҕа Матрена Бочкарева түһэриитэ