Бээдигэ саҥа биэлсэр-акушер пууна тутуллуо

Уус Алдан улууһугар Дүпсүҥҥэ төлөпүөнүнэн эрийэ сырыттым. Олохтоохтор доруобуйа харыстабылыгар улахан болҕомто уурулларыттан улаханнык сэргэхсийэн олороллор.

Нэһилиэк дьаһалтатын исписэлииһэ Мария Спиридоновна Иванова иһитиннэрбитинэн, Бээдигэ биэлсэр-акушер пуунун тутуу доруобуйа харыстабылын бастакы сүһүөх звенотун саҥардыы, тупсарыы бырагырааматын чэрчитинэн ыытыллар.

-Бээдигэ биэлсэр-акушер пуунун тутарга акылаат түһэр сиригэр нэһилиэк дьаһалтатын уонна олохтоохторун күүстэринэн сирин-уотун бэлэмнээһиҥҥэ, буорун кутууга үлэ ыытыллыбыта.  Тутааччылар саас үлэтин саҕалыахтаахтар. Манна мэдиссиинэ тэрилэ барыта ылыллан, Дүпсүннээҕи балыыһаҕа аҕалыллыбыта.

Түгэнинэн туһанан манныгы ахтан ааһар тоҕоостоох. Бээдигэ биэлсэр-акушер пууна 40 тахса сыл анараа өттүгэр 4 кыбартыыралаах уопсай дьиэ биир кыбартыыратыгар киирэн үлэтин саҕалаабыта. Бу сыллар усталарыгар ханна да халбарыйбакка, 40-тан тахса сыл устата үтүө суобастаахтык үлэлээн олохтоохтор ытыктабылларын ылан биэлсэр Мааса дэппит СӨ доруобуйа харыстабылын үтүөлээх үлэһитэ Мария Нафанаилова үлэлиир. Түмүкпэр, ыраах сытар кыра кытыы бөһүөлэктэри сайыннарыыга туһуламмыт бырагырааманан сайда тур, мин төрөөбүт төрүт сирим Бээди диэн этэбин.

Иван Сивцев — Бээди.