Бэҕэһээ тымныынан сибээстээн 323 оскуолаҕа актированнай күн биллэриллибит

Үөрэх уонна билим министиэристибэтэ иһитиннэрбитинэн, тохсунньу 9 күнүнээҕи туругунан, халлаан тымныытынан сибээстээн, өрөспүүбүлүкэ 29 улууһугар 323 оскуолаҕа актированнай күн биллэриллибит.  

Ол курдук, олоҕурбут көрүҥүнэн (очно) 302 оскуолаҕа 54041 оҕо үөрэммит. Тэйиччиттэн (дистанционно) 178 оскуолаҕа 22400 оҕону үөрэппиттэр. 153 оскуола буккаас көрүҥүнэн (в смешанном формате) үлэлээбит, ол эбэтэр 31685 оҕону хаппыт.

Үөрэх уонна билим министиэристибэтэ тымныы күннэргэ үөрэнээччилэр олохторун уонна доруобуйаларын харыстыыр, санитарнай-гигиеническэй нуорманы тутуһар инниттэн үөрэҕи дистанционнай технологияны уонна электроннай үөрэҕи туһанан ыытарга сүбэлиир.

Бүгүн Саха сирин үрдүнэн халлаан бэҕэһээҥҥитээҕэр лаппа тымныйбыт. Онон өссө элбэх оскуола тэйиччиттэн үөрэтэрэ буолуо диэн сабаҕалыыбыт.