ДПС үлэһиттэрэ ыал дьиэтин баһаартан быыһаатылар

Ыам ыйын 1 күнэ үүммүт сарсыардатыгар эрдэ Дьокуускай куорат ДПС иниспиэктэрдэрэ полиция лейтенана Арнольд Григорьев уонна полиция младшай лейтенана Анатолий Сивцев патруллуу сылдьан Ильменскэй уулууссаҕа баар  чааһынай дьиэ тиэргэниттэн буруо тахсарын көрбүттэр.

Буруо тахсар сиригэр тиийбиттэрэ дьиэ аттыгар турар гараас умайа турар эбит диэн ИДьМ пресс-сулууспата иһитиннэрэр. Полиция үлэһиттэрэ баһаарынай сулууспа дьуһуурунай чааһыгар иһитиннэрбиттэр уонна баһаарынайдары ыҥырбыттар. Биирдэрэ тута олбуор нөҥүө ыстанан, олбуор аанын аспыт. Ол кэннэ дьиэҕэ киирэн, хаһаайыттары уһугуннаран таска таһаарбыттар. Дьиэҕэ хаһаайын, кини кэргэнэ уонна сааһын ситэ илик уоллара баар эбит.

Уот дьиэҕэ уонна гаас холбонон турар сиригэр тиийиэ диэннэр полиция үлэһиттэрэ дьахтары уонна оҕону куттала суох сиргэ баралларыгар соруйбуттар. Бэйэлэрэ ыал аҕатын кытары гараас аттыгар турар пургуон массыынаны олбуор таһыгар таһааран бараннар, уоту кытары охсуһарга туруммуттар.

Сотору кэминэн баһаарынай сулууспа кэлэн, уоту умуруорбуттар. Быһылаан түмүгэр ким да эмсэҕэлээбэтэх, уот гарааһы эрэ сиэбит. Полицейскайдар суһал уонна быһаарыылаах дьаһаныыларынан уоту тохтоппуттар.

Дьиэлэрэ уоттан быыһаммыт ыаллар ИДьМ миниистирин аатыгар полиция лейтенана Арнольд Григорьевка уонна полиция младшай лейтенана Анатолий Сивцевкэ махтанан тураннар, наҕараадаҕа түһэрэргэ көрдөспүттэр.