Бэрдьигэстээх түөлбэлэрэ кэскиллээх бырайыактары көмүскээтилэр

Быйыл Ил Дархан түөлбэлэр сайдыыларыгар туһуламмыт куонкуруһугар Горнай улууһа бастыҥынан ааҕыллыбыта.

Бу күннэргэ улууска түөлбэлэр сыллааҕы үлэлэрин түмүгүн, инники былааннарын ырыттылар, дьүүллэстилэр.  Эһиилги сылга ханнык бырайыактар олоххо киирэллэрин туһунан Бэрдьигэстээх баһылыгын солбуйааччы Ксенья Васильева кэпсээтэ:

— Соторутааҕыта Горнай улууһун түөлбэлэрэ инники сылларга ыыппыт үлэлэрин барытын түмэн, сыаналаан Горнай улууһа нэһилиэнньэ ахсаанынан араарыллыбыт бэйэтин бөлөҕөр, кыайыылаах тахсан, 1 мөл. 700 тыһ. солк ылары ситистэ.  Бу үпкэ эбии 200 тыһ. солк. эбэн, уопсайа 1 мөл. 900 солк. улуус дьаһалтата нэһилиэктэр ортолоругар анал куоҥкурус биллэрбитэ. Манна 5 нэһилиэк кыттыыны ылбытыттан, 4 нэһилиэк тустаах үпкэ тиксибитэ.

Бэрдьигэстээх нэһилиэгэ улуус иһигэр кыайыылаах тахсан? 850 тыһ. 750 солк. ылбыта. Бу харчыга тиксэр сыаллаах Бэрдьигэстээх 8 түөлбэтэ, эһиилги сылга култуурунай, спортивнай тэрээһиннэри ыытарга, доруобуйа туругун тупсарарга, төрөөбүт тыл сайдарыгар, төрүт дойду устуоруйатын, үгэстэрин харыстыырга туһуламмыт араас хайысхалаах үлэлэри ыытарга бырайыактары көмүскээтилэр.

Ол курдук, күрэс түмүгүнэн: «Үрдэл» – 150 000 солк. (ыччакка, нэһилиэнньэҕэ туһуламмыт доруобуйаҕа туһалаах спортивнай култуурнай-маассабай тэрээһини ыытыы),  «Мелиоратор» – 150 000 солк. (төрөөбүт дойду устуоруйатын, үгэһин, тылы үөрэтии уонна үйэтитии), «Эбэ» – 150 000 солк. (аһаҕас халлаан туонатыгар ыччаты дуобакка дьарыктааһын), «Эйэ» – 100 000 солк. (төрөөбүт дойду устуоруйатын үгэһи, тылы үөрэтии уонна үйэтитии), «Сардаҥа» – 100 000 солк. (Тимофей Сметанин «Кыhыл былаах» испэктээгин туруоруу), «Киин» – 75 000 солк. («Кутаа тула» хайысха: төрөөбүт тылы сайыннарыы), «Чэбдик» – 75 000 солк. (доруобуйаҕа туһалаах спортивнай култуурнай-маассабай тэрээһиннэри ыытыы), “Сэргэлээх” – 70 750 солк. («Үҥкүү бөлөҕө» хайысха: култуура) ылары ситистилэр.