Алексей Смертин: «Махтал эйиэхэ, Өймөкөөн, бу маны барытын мин трассаҕа өйдөөтүм!»

Быйыл Өймөкөөҥҥө экстремальнай марафон элбэх ахсааннаах кыттааччынан рекорду олохтуур соруктаах ыытылынна.

Ол курдук, былырыыҥҥы тэрээһиҥҥэ Арассыыйа 16 эрэгийиэниттэн 50 спортсмен кыттыбыт буоллаҕына, быйылгы тэрээһиҥҥэ 96 сүүрүк Арассыыйа 44 эрэгийиэниттэн, Саха сирин 26улууһуттан араас дистанцияҕа сүүрдүлэр. Ону тэҥэ Белоруссия, Япония курдук дойдулартан кыттар буоланнар, тэрээһин аан дойдутааҕы таһымнаах. Араас кэмҥэ Тымныы полюһугар Өймөкөөҥҥө ыытыллар марафоҥҥа Италия полициятын үлэһитэ Паоло Вентурини, экстремальнай таһымнаах тэрээһиннэри көтүппэт Молдавия спортсмена Дмитрий Волошин курдук кытаанах санаалаах дьон кыттыбыттара. Бу туһунан «Саха сирэ» хаһыат сиһилии сырдатан турар.

Чаҕылхай кыттааччылар кэккэлэрин быйыл футболга Арассыыйа сүүмэрдэммит хамаандатын урукку хапытаана Алексей Смертин хаҥатта. Кини 50 км ультрамарафоҥҥа сүүрүүгэ кыттыытын Арассыыйа олохтоохторо анаан кэтээн көрө олордулар.

Бу марафоҥҥа айаныттан саҕалаан сүүрэр кэмин кытта бэйэтин телеграм-ханаалыгар сырдата олордо. Онон кини 3300 сурутааччыта кулгаах-харах буолан, кыраҕытык кэтии олордубут.

https://t.me/sakhasire20/65068

“Өймөкөөҥҥө «Тымныы полюһа» диэн экстремальнай марафону түмүктээтим. 50 км 50 сааспар – планета биир саамай тымныы сиригэр. Түмүгүм: 4:45. Бэйэм сааспар — 1 миэстэ. Тымныы усулуобуйаҕа сөптөөх түмүк дии саныыбын. Бу сүүрүү миэхэ сезон рекорда буолбатах. Бу — айан биир чааһа, тус кыахпын атын өттүттэн көрөр баҕа санаа. 45 кыраадыстаах Сахаара кэнниттэн, олох утары хайысханан – тымныы диэки барбытым. Онон хас биирдии суолталаах түгэн тулууру уонна ис турук саҥа көрүҥүн арыйар. Тымныы усулуобуйаҕа 50 км дистанция 50 сааспар биир бэлиэ бэлэҕинэн буолла.  Өймөкөөҥҥө Тымныы полюһугар марафоҥҥа кыттыым быраатым Евгений төрөөбүт күнүгэр сөп түбэстэ. Бу сүүрүүбүн киниэхэ бэлэх быһыытынан аныыбын” диэн суруйда бэйэтин телеграм-ханаалыгар Алексей Смертин.

“18-с килэмиэтиртэн саҕалаан, олох ыарахан буолла. Онтон үлэ дьэ саҕаланна ээ. 35 км диэри сүүрбэккэ, хас биирдии хардыыны тардан эрэ истим. Тымныыга иҥиирдэрим кытаатан бардылар. Ыарыыта сүр. Миигин кулгаахпар иһиллэр муусука уонна инники күөҥҥэ барар дьулуур эрэ быыһаатылар. Манна тымныы эн кимҥин уонна тоҕо бу марафоҥҥа кыттаргын дьэҥкэтик быһаарар. Махтал эйиэхэ, Өймөкөөн, бу маны барытын мин трассаҕа өйдөөтүм!”,— ама, марафоҥҥа кыттааччыттан ураты ким бу курдук ис дууһатын арыйыай? Кини буоллаҕа – Алексей Смертин!