Бэрдьигэстээх түөлбэлэрэ Саҥа дьылы көрсөргө бэлэмнэр (ВИДЕО)

Горнай улууһун Бэрдьигэстээх сэлиэнньэтин  хас биирдии түөлбэтэ былырыын анал дизайн-кодка олоҕуран, аччыгый искибиэрдэри  туттубута.

Бу туһунан Бэрдьигэстээх сэлиэнньэтин баһылыгын солбуйааччы Ксенья Васильева маннык кэпсээтэ:

— Кэрэхсэбиллээҕэ, түөлбэ аайы ханна киирбиккин чуо билэҕин.  Хас биирдии түөлбэ аата суруллан турар. Кыһыннары буоллун, сайыннары буоллун, түөлбэ олохтоохторо түөлбэлэрин киин сирин анаан тупсараллар: сайын сибэкки олордоллор, кыhын Саҥа Дьылга түөлбэлэрин киэргэтэллэр.

Олохтоохтор ордук оҕолорун үөрдээри искибэрдэрин тупсарар туhугар олус кыhаллаллар, түмсэллэр, харчы кыттыhан кэрэчээн харыйа туруораллар, гирлянда атыылаhаллар.

Хаарынан эбэтэр мууhунан сыл бэлиэтин оҥороллор. Быйыл  араас  куобах оҥоһук элбээбит. Ийэ сылын чэрчитинэн хас да оҕолоох Ийэ Куобах  хас  да куобахчааннаах  турарын үгүстэ көрүөххэ сөп.

Хас биирдии түөлбэ бэйэтэ туспа буочардаах. Ол курдук, үгүстэр харыйаларын бэйэлэрин илиилэринэн оҥорбут оонньуурдарынан киэргэппиттэр. «2023 сыл» диэн хаарынан, сорохтор турбанан оҥорон суруйбуттар.

Анаан-минээн уоттаах-күөстээх араас оҥоhуктары, Саҥа дьылга сыhыаннаах киирии аарка, мууhунан киэргэл оҥорбуттар.

Сорох түөлбэ араас тэрээhини тэрийэн, Тымныы оҕонньору ыҥыран, оҕолоругар бэлэх  ууннулар. Түөлбэлэрбит маннык кэрэхсэбиллээхтик олорор сирдэрин киэргэтэллэрэ олус кэрэхсэбиллээх. Олохтоох дьон уонна ыалдьыттар кэрийэ сылдьан хаартыскаҕа түһэллэрин көрө-көрө киһи сүргэтэ көтөҕүллэр.

Ити курдук, «ЭЙГЭ-2022» бириэмийэ кыайыылааҕа Горнай улууһун  Бэрдьигэстээҕэ бары улуус кииннэригэр бастыҥ холобуру көрдөрөр —  олохтоохтор ким эрэ кэлэн кимнилэр олохторун тупсарарын кэтэспэккэ, санааны көнньүөрдэр, олоҕу киэргэтэр, оҕону үөрдэр усулуобуйаны бэйэлэрэ тэрийэллэр.

Салгыы видео-устууну көрүҥ