Салгыы
Бэрдьигэстээххэ оҕолор дьокутаат оруолун толордулар

Бэрдьигэстээххэ оҕолор дьокутаат оруолун толордулар

28.10.2022, 22:15
Бөлөххө киир:

Горнай улууһун Бэрдьигэстээх сэлиэнньэтин дьаһалтатыгар  бэрэстэбиитэллээх уорган сэбиэтин дьокутааттарын сиэссийэтин оскуола оҕолоро иилээн ыыттылар.

Бэрт сонун тэрээһин «Нэһилиэк сэбиэтин модела» диэн ааттаах. Дьыалабыай оонньуу иккис сылын ыытыллар. Быйылгы тэрээһин нэһилиэги тупсарыыга туһуланна.

Бу туһунан  Бэрдьигэстээх олохтооҕо Василий Тимофеев маннык иһитиннэрдэ:

Хас биирдии «дьокутаат» оҕо Бэрдьигэстээҕин тупсарыыга бэйэтин этиитин киллэрдэ. Биирдиилээн оҕолору тэҥэ, бөлөҕүнэн эмиэ кытыннылар. Улахан дьонтон атыннара — оҕо хараҕынан этиллибит санаа буолан, олус итэҕэтиилээхтэрин бэлиэтиир тоҕоостоох. Холобур, оптуобус  тохтобулларыгар төлөпүөн, ноутбук ииттэрэр анал сирдэри, саҥа тутуллубут элбэх кыбартыыралаах дьиэлэргэ ыты күүлэйдэтэр былаһааккалар, суоллар кытыыларыгар баар тротуардар доруобуйаларынан хааччахтаах дьоҥҥо табыгастаах буолалларын ситиһии, гаас ситимин тардар тэрилтэ хаһыллыбыт сирдэрин чөлүгэр түһэрии,  бөх тоҕор полигону күрүөлээһин уо. д. а. бэрт туһалаах уонна  кэскиллээх  боппуруостары ырытыы буолла. Тыл этээччи киниэхэ бэриллибит бириэмэтин чопчу тутуста.  Оҕолор бары да эрдэттэн бэлэмнэнэн кэлбиттэрэ, харахха чуо быраҕыллар. Бэл, дьиҥнээх парламентердардыы, тыл этэллэригэр хамсаныылара да эмиэ  дьоһун, оруннаах.  

Дьыалабыай оонньууну тэрийээччи Дьулустаан Алексеев бэлиэтииринэн, бу  тэрээһин оҕо толкуйдуур, саҥарар-иҥэрэр кыаҕын сайыннарарга туһуланар. «Ийэ дойдуга бэриниилээх буолууга иитии — бу үлэ биир сонун көрүҥэ. Ол иһин оҕо  төрөөбүт дойдутун хайдах көрүөн баҕарарын, ол көрүүтүн хайдах тиэрдэрин, атын дьон этиитин хайдах ылынарын көрөөрү, үөрэтээри  маннык оонньууну тэрийдибит», — диэн санаатын үллэһиннэ Дьулустаан Алексеев. Оонньуу түмүгэр оҕолор Хайҕал суруктары туттулар. Бастакы миэстэҕэ Айсаар Николаев, иккискэ — Елена Ефремова, үһүскэ Володя Попов тигистилэр.

 «Бэрдьигэстээх нэһилиэгэ» МТ баһылыгын солбуйааччы Ксения Васильева оонньуу быйыл олус сэргэхтик ааспытын бэлиэтээтэ. «Оҕолор сиэссийэҕэ  киллэрбит боппуруостара бэйэлэрин тус көрүүлэриттэн, сыаналааһыннарыттан ылыллыбыт буолан, кырдьыктаахтар. Манна билиҥҥи ыччат майгыта-сигилитэ, култуурата, олоҕу көрүүтэ барыта көстүбүккэ дылы. Биһиэхэ, олохтоох былааска үлэлии-хамсыы сылдьар дьоҥҥо, олус туһалаах, ураты тэрээһин буолан ааста. Хайдах эрэ туораттан бэйэбитин көрөн ыллыбыт.  Оонньуу кэмигэр оҕо-«дьокутааттар» туруорсубут боппуруостарын быһаарыыларын инникитин нэһилиэк дьокутааттарын сиэссийэтигэр мэктиэ быһыытынан  киллэриэхпит», — диэн Ксения Михайловна санаатын тиэртэ. 

Бэрдьигэстээх сэлиэнньэтин олохтоох дьаһалтатын оҕону патриотическай итиигэ туһуламмыт сонун  сүүрээнин холобура батыһыннарыылаах буоларыгар эрэнэбит.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
24 апреля
  • 2°C
  • Ощущается: -0°Влажность: 87% Скорость ветра: 2 м/с

Сообщить об опечатке

Текст, который будет отправлен нашим редакторам: