Бэргэн ытааччыларбыт Арассыыйа куубагын финалыттан биэс мэтээллэннилэр

Успуорт сонуннара:

• Балаҕан ыйын 29 – алтынньы 9 күннэригэр Читаҕа “Мегаполис-Спорт” аренатыгар Сахабыт сириттэн 20-чэ спортсмен кыттыылаах Арассыыйа буоксаҕа чөмпүйэнээтэ үгэннээн буола турар. Күрэхтэһии састааба олус күүстээх. Олимпийскай оонньуулар, аан дойду, Европа медалистара бааллар. Бириис пуондата да олус үрдүк – 26 мөлүйүөн солкуобай. Кыһыл көмүс мэтээли ылбыттар 1,5 мөлүйүөн солкуобайынан, үрүҥ көмүс уонна боруонса мэтээллэргэ тиксибиттэр, туһааннааҕынан, 250, 125 тыһыынча солкуобайынан наҕараадаланыахтара. Дойду 60 эрэгийиэниттэн 300-н тахса кыттааччы 13 ыйааһынынан рингэҕэ тахсыахтара. Киирсиилэр “Матч-ТВ” телеханаалга көстөллөр.
  Биһиги боксердарбыт Василий Егоров 51 киилэҕэ, Николай Григорьев, Михаил Варламов 57 киилэҕэ, Виталий Стручков 60 киилэҕэ рингэҕэ иккилиитэ тахсан кыайыылары ситистилэр. Ян Алексеев, Валентин Иванов, Айтал Андреев, Назар Андреев бастакы-иккис көрсүһүүлэригэр хотторуу хомолтотун биллилэр.

• Адыгея Өрөспүүбүлүкэтигэр стендовай ытыыга Арассыыйа куубагын финала түмүктэннэ. Бэргэн ытааччылардаах Сахабыт сирин хамаандата үс үрүҥ көмүс уонна биир боруонса мэтээллэри ылаттаан бэркэ кытынна. Биирдиилээн ытыыларга Хаҥаластан Вероника Иванова үрүҥ көмүс уонна Липецкэй, итиэннэ Калуга кыргыттарын кытта үһүө буолан “трап” диэн упражнениеҕа хамаандаҕа боруонса мэтээллэннэ. Чурапчыттан Антон Васильев Краснодар, Курган уолаттарыныын хамаанданан көрдөрүүгэ эмиэ үрүҥ көмүс мэтээли ылары ситистэ. Уус Алдантан Николай Протопопов Липецкэй уолаттарын кытта хамаанданан түмүккэ үһүс үрүҥ көмүс мэтээли аҕалла. Николай Протопопов Липецкэйтэн Юлия Савельеваны кытта эр киһи-дьахтар буккаас ытыыларыргар үһүс миэстэлэннэ. Онон, саха бэргэн ытааччылара уопсай түмүккэ биэс мэтээллэннилэр.
• 42 км классическай марафоҥҥа сүүрүүнэн кэлин утумнаахтык дьарыктанар Чурапчыттан төрүттээх-уустаах 51 саастаах Петр Захаров аан дойдуга биллэр 2021 с. Чикаго, 2022 с. Бостон уонна бу балаҕан ыйыгар Берлин марафоннарыгар сүүртэлээтэ. Аны — Лондон, Нью-Йорк, Токио марафоннарыгар тиийтэлээн, сүүрэн, аан дойду алта улахан марафоннарыгар кыттан, анал оҥоһуулаах “Six Star Finishtr” мэтээли ылар сыаллаах-соруктаах.

• Нижнэй Новгородка түмүктэммит 100 км ультра-марафоҥҥа Арассыыйа чөмпүйэнээтигэр Сахабыт сириттэн уҥмат тыҥалаах быһыйдарбыт чаҕылхайдык кытыннылар. Надежда Бут 7 чаас 25 мүн 12 сөк биэтэккэ бастакынан кэлэн чөмпүйүөн үрдүк аатын сүгэри ситистэ уонна норуоттар икки ардыларынааҕы кылаастаах успуорт маастарын нуорматын толордо. Изабелла Борисова боруонса мэтээлгэ тигистэ. Эр дьоҥҥо Александр Маедо сүүрүүтүн төрдүһүнэн түмүктээн 6 чаас 52 мүн 33 сөк көрдөрүүлээх Арассыыйа маастарынан буолла. Василий Лукин алтыс көрдөрүүлэннэ (7:09:20) уонна маастарга хандьыдаат нуорматын толордо. Хамаанданан түмүккэ Саха марафонецтара бастакы миэстэни ыллылар. Кыайыылаах хамаанданы тириэньэрдэр Татьяна Жиркова, Василий Спиридонов бэлэмнээтилэр.

Баһылай Посельскай.