Бэрт-Ууһугар «Байанай» күрэхтэһиитэ ыытылынна

Уус Алдан улууһун Бэрт-Ууһун нэһилиэгэр сэтинньи 23 күнүгэр «Байанай» күнүгэр анаан булчут уолаттар көҕүлээһиннэринэн быыстапкалаах, викториналаах, күрэхтэһиилээх бэрт сэргэх тэрээһин буолан ааста.

Байанайбыт киэһэтигэр таарыйа Олоҥхо уонна хомус декадатын дьүөрэлии тутан, «Саха» көрдөрөр-иһитиннэрэр хампаанньа ыыппыт «Олоҥхо Батл» кыттыылааҕын, Өлтөх нэһилиэгин Бэйдиҥэ кулуубун дириэктэрин Игнатий Слепцову ыалдьыттатан, олоҥхо аахтаран дьиэрэттибит, бэйэбит Егор Ширяевпыт хомуһун тыаһын чугдаартыбыт. Аҕа баһылыкпыт Илья Ильин Байанай күнүнэн эҕэрдэтин тиэртэ уонна нэһилиэкпит биир убаастанар киһитэ, байанайдаах булчуппут Петр Николаевич Алексеев кэргэнигэр Анастасия Петровнаҕа Геннадий Бурцев дьиэ кэргэнин аатыттан кус уонна булт этин туттарда.

Дьоро киэһэбит кэтэһиилээх «Байанай бэлэҕэ» сүүйүүлээх оонньуутугар сүрүн бирииһинэн «Бадаар» булт маҕаһыыныттан 20 тыһ.солк. сэртипикээт оонньонно. Итини таһынан Руслан Федотов маҕаһыыныттан сэртипикээттэр, электромассажер (А.П.Иванов аат, НАК дир .Л.Л.Бурцева), Илларион Попов салалтатынан үлэлиир уус уолаттар Егор Колодезников, Анатолий Иванов, Александр Катакинов быһахтара, Иван Ефимов быһаҕа, Валерий Колодезников, Александр Петров, Василий Копырин, Спиридон Садовников, Прокопий Колодезников, Александр Аммосов, ини-бии Михаил, Афанасий, Анатолий, Павел Копыриннар, Олег, Николай Черкашиннар, Василий Бурцев, Григорий Бурцев , Василий Местников, Василий Петров, Василий Явловскай бултаабыт кустарын, хаастарын, андыларын, балыктарын, куобах, бултарын эттэрэ уонна «Хаптаанньа Эбэҕэ» балыктаабыт муҥхаһыттар уонна олохтоох дьаһалта аатыттан биир куул балык баар. Сүрүн бирииһи байанайдаах булчут Прокопий Колодезников сүүйдэ. Тэрээһиммит ити сүүйүүлээх оонньуунан муҥурдаммата .

«Саамай, саамай» диэн собо куонкуруһугар Егор Ширяев кыайан, Валерий Стручков туруорбут бирииһинэн наҕараадаланна. Булка сыһыаннаах боппуруостарга кыайыылааҕынан Илья Ильин буолла уонна НАК бирииһэ туттарылынна. Үс көрүҥнээх күрэхтэһиибитигэр алта булчут кыттыбытыттан, 1 миэстэ Явловскай Василий Дмитрий Попов туруорбут балаакка-дугда хаһаайынынан буолла. 2миэстэҕэ Егор Ширяев тиксэн, 1,5 тыһ.солк. суумалаах сэртипикээтинэн наҕараадаланна уонна бочуоттаах 3 миэстэ Александр Иванов буолан, 500 солк. сэртипикээти ылары ситистэ.

Бүтэһик күрэхтэһиибит «Оҕо саас ахтылҕана» көрүҥҥэ арагаакканан ытыыга кэлбит эр дьон уонна кэрэ аҥаардарбыт үксэ кыттыбытыттан, 1 миэстэ Валерий Стручков ылан 30 устуука ботуруонунан, 2 миэстэ Егор Ширяев хааһынан, 3 миэстэ Галина Олесова ылан сыа мурун диэн муора куһунан наҕараадаланнылар. Бу көрүҥҥэ Василий Явловскай оҥорбут арагааккатынан ыттаран доҕорунаан Николай Черкашинныын олохтообут бириистэрин туттулар.

Дьэ уонна түмүккэ мустубут дьон булчут уолаттар бэлэмнээбит остуолун тула ирэ-хоро кэпсэтэн, эт арааһын амсайан сүргэлэрэ көтэҕүллэн тарҕастылар. Норуот айымньытын киинин үлэһиттэрэ нэһилиэкпит булчуттарыгар тэрээһиҥҥэ күүс-көмө буолбут дьоммутугар махтал тылбытын тиэрдэбит.

Василий Черкашин.