БЭС ЫЙА — ҮРҮҤ АЙЫЫ ТОЙОН ЫЙА

Бэс ыйыгар Үрүҥ Айыы чугаһаан, Айыы аартыга арыллар.

Айыы аартыгын бата алгыс көтөҕүллэр. Сиэри ситэриллэн, туом толоруллан туран этиллэр алгыс дьон үтүө санаатын,  дьулуурун түмэн Айыыларга таһаарар.

Ый билгэтэ: күнү-дьылы билгэлииргэ маннык күннэри кэтээн көрүү ордук суолталаах:

3 — бу күн сөҥүү түстэҕинэ, күһүн эмиэ ардахтаах буолар;

10 — бу күн чуумпу буоллаҕына, үрдүк үүнүүнү кэтэс;

16 — хотугулуу-арҕааттан тыал үрдэҕинэ, өҥ сайын буолуо. Этиҥнээх ардах — от үлэтэ уустуктук ааһарын бэлиэтэ. Күнү быһа ардаатаҕына — тэллэй элбэх.

Бэс ыйын туомнара:

Үрүҥ Айыыны олордуу. Үрүҥ Айыы үтүө  тыынын түһэрии туома  ый саҥатыгар буолар. Бу кэмтэн дьиҥнээх ыһыахтар саҕаланаллар.

Сайылык малааһына. Сайылык сирин-уотун аһатан малааһын тэриллэр. Саламааттаах буолар. Туом ый үһүс чыыһылатын диэки буолар.

Саха ыалын халандаарыттан