Бэс ыйыгар уһун өрөбүллэр күүтэллэр

Саха сиригэр бэс ыйыгар икки бырааһынньык бэлиэтэнэр — Арассыыйа күнэ уонна Ыһыах күнэ. Манан сибээстээн икки уһун өрөбүллэр күүтэллэр. Ол туһунан Үлэҕэ уонна социальнай сайдыыга министиэристибэтигэр иһитиннэрдилэр.

Арассыыйа күнүнэн биэс хонуктаах үлэ нэдиэлэтин үлэһиттэрэ бэс ыйын 12-15 күннэригэр сынньаныахтара. Бэс ыйын 13 күнүгэр кулун тутар 8 күнүнээҕи өрөбүл күн көһөрүллэр.
Бэс ыйын 21 күнүгэр бэлиэтэнэр Ыһыах күнэ быйыл субуотаҕа түбэстэ. Онон өрөбүл күн бэс ыйын 23 күнүгэр көһөрүлүннэ — ыһыахха үс күн устата сынньаныахпыт. Судаарыстыбаннай бүддьүөттэн үбүлэнэр тэрилтэлэр үлэһиттэригэр бу бырааһынньык күннэрэ бары үлэһиттэргэ тарҕанар.

Нэдиэлэҕэ алта күн үлэлээччилэргэ бырааһынньык күннэрэ көһөрүллүбэттэр — бэс ыйын 12 уонна 21 күннэрэ. Бэс ыйын 11 уонна 20 күннэригэр биир чаас үлэ чааһа кылгаан биэрэр.
«Өрөбүллэргэ уонна бырааһынньыктарга үлэ төлөбүрэ икки бүк төлөнөр, эбэтэр эбии өрөбүлү атын күҥҥэ туһаныахха сөп», — диэн Үлэҕэ уонна социальнай сайдыыга министиэристибэтэ санатар.