Биэлсэр Мааса

Маҥан кынаттаах аанньаллар хаһан эрэ былыр халлаан куйаарынан кырыйа көтөн сылдьаллара, олортон саамай амарах санаалаахтара орто дойдуга дьону эмтээри кынаттарын устан олохсуйа хаалбыттар диэн номох баар.

Мин кэпсиир аанньалым аата Мария Егоровна Кириллина. Бу дьоҥҥо туһалаах, эмиэ да улахан эппиэ­тинэстээх идэни тоҕо талбытын токкоолоспокко да сэрэйэбин – дьону быыһыыр, эмтиир эрэ баҕаттан. Баҕар, күн күбэй ийэтэ эдэригэр ыалдьан бу олохтон барбытыттан буолуо… Маша Дьокуускайдааҕы мэдиссиинэ училищетын бүтэрэн Мииринэйгэ Таас Үрэххэ биэлсэринэн анатан кэлбитэ түбэһиэх буолбатах. Бу дойду – эдэркээн кыыс хаһан да харахтаан көрбөтөх ийэтинэн халыҥ аймахтара Сунтаар  Бүлүүчээниттэн былыр көһөн кэлэн сөбүлээн олохсуйбут сирдэрэ. Баҕар, ол эмиэ төрүөт буолбута дуу.

Сунтаартан, олоҥхо дойдутуттан, төрүттээх биһиги Биэлсэр Маасабыт, Мария Егоровна Кириллина – Таас Үрэх биир сис ыалын күн күбэй ийэтэ, үс оҕо­лоох, сиэннэрдээх. “СӨ доруобуйатын харыстабылын үтүөлээх үлэһитэ”, “СӨ доруобуйатын харыстабылын туйгуна”, “Мииринэй оройуонун доруо­буйатын харыстабылын үтүөлээх үлэһитэ» ааттар,  СӨ Бэрэсидьиэнин Махтал суруга, араас таһымнаах хайҕал суруктар – бу түөрт уон ордугуна түөрт сыл сындалҕаннаах үлэ үрдүк сыанабыла. Мария Егоровна бу дойдуну булуоҕуттан үлэлээбит балыыһатын аанын аргыый сабан тахсан бочуот­таах сынньалаҥҥа бардар даҕаны, билигин да үлэ үөһүгэр сылдьар, АЛРОСА-ГАЗ тэрилтэҕэ биэлсэрдиир.

Ол саҕана биһиэхэ Мииринэй куораттан “Ан-2” сөмөлүөт көтөр этэ. Муус устар 18 күнүгэр, 1979 сыллаахха Маша Таас Үрэх буоругар үктэммитэ. Оччолорго туох дии санаабытын бэйэтэ эрэ билэн эрдэҕэ, ол эрэн, олоҕун бүттүүнүн бу бөһүөлэккэ аныам диэбэтэҕэ буолуо эбээт. Эдэркээн кыыс кэлээт да үлэ үөһүгэр түспүтэ. Тыа сирин биэлсэрэ диэн тугу барытын сатыыр эмчит буоллаҕа, тиис туурартан саҕалаан оҕо төрөтөргө тиийэ. Акушер быһыытынан төһөлөөх оҕоҕо күн сирин көрдөрбүтэ буолуой?  Аны, кини туруорбут диагноһа УЗИ-та, рентгенэ суох куруук сөп буолааччы. Оҕолоноору сылдьар ийэлэргэ төрүүр күннэрин этэрэ аҕыйах эрэ күн сыысхаллаах буолан сөхтөрөрө. Бу үлэлээбит сылларын тухары төһөлөөх элбэх киһи үрүҥ тыынын өрүһүйбүтэ буолуой, ким  ааҕыа баарай. Эмчит буоларга ананан төрөөбүт диэххэ сөп буолуо.  Эдэрдиин-эмэнниин Биэлсэр Мааса диэн аат биэрбиттэрэ ыраатта. Бу аакка киһиэхэ эрэ барытыгар бэриллибэт дириҥ убаастабыл, норуот таптала түмүллүбүт.

Сунтаартан, олоҥхо дойдутуттан, төрүттээх биһиги Биэлсэр Маасабыт, Мария Егоровна Кириллина – Таас Үрэх биир сис ыалын күн күбэй ийэтэ, үс оҕо­лоох, сиэннэрдээх. “СӨ доруобуйатын харыстабылын үтүөлээх үлэһитэ”, “СӨ доруобуйатын харыстабылын туйгуна”, “Мииринэй оройуонун доруо­буйатын харыстабылын үтүөлээх үлэһитэ» ааттар,  СӨ Бэрэсидьиэнин Махтал суруга, араас таһымнаах хайҕал суруктар – бу түөрт уон ордугуна түөрт сыл сындалҕаннаах үлэ үрдүк сыанабыла. Мария Егоровна бу дойдуну булуоҕуттан үлэлээбит балыыһатын аанын аргыый сабан тахсан бочуот­таах сынньалаҥҥа бардар даҕаны, билигин да үлэ үөһүгэр сылдьар, АЛРОСА-ГАЗ тэрилтэҕэ биэлсэрдиир.

Амарах сүрэхтээх маҥан халааттаах аанньалбыт куруук үөрэ-көтө, чэгиэн доруобай сырыт, дьонуҥ-сэр­гэҥ махталынан уохтанан!

Зоя Данилова.

Хаартыска ааптар тиксэриитэ