Биэс оҕо биир кэлим эксээмэни 100 баалга туттарда

Биир кэлим эксээмэҥҥэ быйыл бастакынан 100 баалы ылбыт оҕолор ааттара билиннэ. Кинилэр кимнээҕий?

Химия биридимиэтигэр Эркин Ноговицын (Өрөспүүбүлүкэтээҕи лиссиэй-интэринээт), Анна Когут (Нерюнгри куорат 2-с нүөмэрдээх гимназията), Кирилл Степанов (В.П.Ларионов аатынан физика-тиэхиньиичэскэй лиссиэй) 100 баалы ыллылар.

Литэрэтиирэни Ирина Леонова (Маҕан орто оскуолата), Айталина Чупрова (Дьокуускай куорат 39-с нүөмэрдээх оскуолата) 100 баалга туттардылар.

Ил Дархан Айсен Николаев: “100 баалы ылбыт оскуоланы бүтэрээччилэрбитин эҕэрдэлиибин – бу тус сыалы ситиһии, дьаныардаах үлэ уонна үрдүк таһымнаах бэлэмнэнии туоһутун түмүгэ.

Үөрэнээччилэр ситиһиилэрин туһугар сыраларын уурбут учууталларга уонна өрүү аттыларыгар буолбут төрөппүттэргэ махтанабын. Бу ситиһиилэр – биһиги уопсай киэн туттуубут, өрөспүүбүлүкэ үөрэҕин систиэмэтэ дириҥ билиини иҥэрэрин уонна олоххо бигэ тирэҕи олохтуурун туоһулуур. Оҕолорго өссө да саҥа кыайыылары, улахан сыалгытын-соруккутун ситиһэргитигэр сөптөөх быһаарыылары! Саха сирэ эһиэхэ эрэнэр!” – диэн эҕэрдэ, махтал тылларын тус телеграм-ханаалыгар үллэстэр.