Биир кэлим эксээмэни 100 баалга туттарбыттарга — 100 тыһ. солк.

Саха сирэ талааннаах ыччаты өйүүр миэрэлэри оннунан хаалларар, кэҥэтэр – биир кэлим эксээмэҥҥэ 100 баалы ылбыт оскуоланы бүтэрээччилэригэр төлөбүр салҕанар.

Аан бастакытын 100 тыһ. солк. кээмэйдээх биир кэмнээх харчынан бириэмийэни 2022 сыллаахха, Саха АССР үбүлүөйдээх 100 сылыгар олохтообуттара. Тустаах көҕүлээһин оҕолору үрдүк академическай түмүгү көрдөрүүгэ дьулуһалларыгар өйүүр.

2022-2024 сылларга харчынан бириэмийэни 100 баалы ылбыт 75 оскуола үөрэнээччитэ туппута. 2022 сыллаахха наҕарааданы 23 оҕо ылбыта, 2023 сыллаахха – 27, 2024 сыллаахха – 25. Кинилэргэ хас биирдиилэригэр 100 тыһ. солк. суумалаах биир кэмнээх төлөбүр бэриллибитэ.
Билигин тус биридимиэттэри талыыга эбии көҕүлүүр миэрэлэри ылынары толкуйдууллар.

«Биһиги оҕолору тус биридимиэттэри — физиканы, химияны, биологияны таларга көҕүлүүр сыаллаах эбии дьаһаллары үөрэтэбит. Бу улахан суолталаах, чуолаан, бу салааларынан инженерия, билим уонна технология кэскилэ үөскүүр, онно Саха сирэ сүҥкэн кыахтаах», — диэн Айсен Николаев бэлиэтээтэ. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.