Бириэмийэни уонна 13-с хамнаһы төлөөһүн быраабылата уларыйда

Үлэ биэрээччилэр үлэһиттэргэ 13-с хамнаһы (сыл түмүгүнэн бириэмийэни) анаабыттарыгар, докумуоннарга бириэмийэ көрүҥүн, кээмэйин, ылар усулуобуйатын уонна төлөнөр болдьоҕун ыйыахтаахтар, диэн РИА Новостига юрист, Москва уонна Московскай уобалас быраап бэрээдэгин киинин салайааччыта Александр Хаминскай кэпсээтэ.

«2025 сыл балаҕан ыйын 1 күнүттэн РФ Үлэтин Кодексатын 135-с ыстатыйатыгар үһүс чаас эбилиннэ. Ол ирдэбилинэн, бириэмийэни аныыр докумуоннар (үлэ уонна кэлэктиип дуогабардара, балаһыанньалар) бириэмийэ көрүҥүн, кээмэйин, ылар усулуобуйатын уонна төлөнөр болдьоҕун чопчу быһаарыахтаахтар», — диэн Хаминскай кэпсээтэ.

Юрист 13-с хамнас — булгуччута суох төлөбүр буоларын, ол туһунан быһаарыыны үлэ биэрээччи бэйэтэ ылынарын санатта. Итини таһынан, маннык бириэмийэ сокуоҥҥа ахтыллыбат, үлэһиттэри көҕүлүүр  эбэтэр корпоративнай тыыннарын бөҕөргөтөр аналлаах. «Сыллааҕы бириэмийэни ааҕыы уонна төлөөһүн усулуобуйалара хампаанньа ис докумуоннарынан (кэлэктиип дуогабарынан, бириэмийэ туһунан балаһыанньанан уо.д.а.) быһаарыллаллар. Маннык бириэмийэ кээмэйэ бигэргэтиллибит да буолуон сөп, эбэтэр үлэһит үлэтин түмүгүттэн эбэтэр орто хамнаһыттан тутулуктаах буолуон сөп. Ааҕар формулалары эмиэ үлэ биэрээччи быһаарар», — диэн Хаминскай санатта.

Юрист бэлиэтээбитинэн, үксүгэр үлэ биэрээччилэр маннык бириэмийэни сыл бүтүүтүгэр эбэтэр аныгыскы сыл саҕаланыытыгар төлүүллэр. Ити кэмҥэ, Хаминскай болҕомтону уурбутун курдук, бу төлөбүртэн, көннөрү хамнастан курдук нолуоктар уонна страховой усунуостар тутуллаллар. Юрист ону таһынан уурайбыт үлэһиккэ 13-с хамнаһы төлөөһүн уратыларын туһунан кэпсээтэ. «Бэлиэтиэххэ наада, өскөтүн үлэһит бириэмийэ төлөнүөн иннинэ уурайбыт, ол эрээри ону ыларыгар бары усулуобуйалар туолбут, бары көрдөрүүлэрэ ситиһиллибит буоллахтарына, үлэһиккэ булгуччу бириэмийэ  төлөнүөхтээх», — диэн Хаминскай түмүктээтэ.