Бразилияҕа Лиза Соловьева кырачаан Кэрэ Куолар күрэҕэр кыттыаҕа

Саха сирин кырачаан моделя – Лиза Соловьева Бразилияҕа Кэрэ Куолар күрэҕэр Арассыыйа чиэһин көмүскүөҕэ.

Бу сылга кини «Маленькая Мисс Россия» куонкуруска ситиһиилээхтик кыттан, аан дойду  талааннаах уонна оҕо куонкурустарын бастыҥтан-бастыҥ кыайыылаахтарын ортотугар норуоттар икки ардыларынааҕы күрэххэ Саха сирин уонна Арассыыйа чиэһин көмүскүүргэ ыҥырыы туппут. Төһө да кыратын иһин, Лиза дьыалаҕа ис санаатыттан күүстээх дьулуурун көрдөрөр. Кини вокалынан (бастакы ырыатын бэлэмниир), үҥкүүнэн дьарыктанар, үлүһүйэн туран саха төрүт үгэстэрин сөргүтэн хомуска оонньуур. Саха сириттэн алта саастаах модель кырачаан кыыс муода эйгэтин баһылыыр уонна ситиһиилэринэн атыттары угуйар.

Санаттахха, бу иннинэ «PRO MODELS» модельнай оскуола үөрэнээччитэ алтынньы 25-26 күннэригэр Дубайга ыытыллыбыт Fashion Factor дьону-сэргэни сөхтөрбүтэ биллэр. Эдэр үөрэнээччи Fashion Factor тэрээһини түмүктүүр чиэскэ тиксибитэ.

«Биһиги Лизабытынан олус киэн туттабыт. Кини ситиһиилэрэ – улахан үлэ, дьулуур, сайдыыга дьиҥнээх таптал түмүгэ. Кини бэйэтин холобурунан оҕолор үрдүк чыпчааллары дабайалларын кыаҕын көрдөрөр. Хас биирдии хардыытыгар – өйөбүл, ыра санааны олоххо киллэрии, дьулуур. Лиза бэйэтин саастыылахтарыгар үтүө холобур, оттон улахан дьоҥҥо айар куту сайыннарыы бэлиэтэ», — диир «PRO MODELS» модельнай оскуола салайааччыта Сардана Порядина.