БРИКС мунньаҕар отуттан тахса судаарыстыба салалтата кэлэрин биллэрдэ

БРИКС норуоттар икки ардыларынааҕы улахан түмсүү мунньаҕар отуттан тахса судаарыстыба аҕа баһылыктара кэлэллэрин биллэрдилэр. БРИКС саммита быйыл Арассыыйаҕа Казань куоракка алтынньы 22-24 күннэригэр буолаары турар.

Арассыыйа тас дойдулар дьыалаларыгар миниистири солбуйааччы Сергей Рябков алтынньы 3 күнүгэр суруналыыстарга иһитиннэрбитинэн, билиҥҥи туругунан, Арассыыйа ыаллыы олорор судаарыстыбаларыттан, Евразиятааҕы экэниэмикэ сойууһун, Тутулуга суох судаарыстыбалар түмсүүлэрин дойдуларыттан отуттан тахса судаарыстыба баһылыктара, ону сэргэ норуоттар икки ардыларынааҕы хас да улахан түмсүү салайааччылара саммикка кэлээри былааннана сылдьаллар. Ол иһигэр БРИКС түмсүүгэ киирбит биэс саҥа судаарыстыба салайааччылара, Турция бэрэсидьиэнэ Реджеп Тайип Эрдоган, Сайдыы саҥа баанын бэрэсидьиэнэ Дилма Русеф.

Санатан эттэххэ, быйылгы саммикка БРИКС түмсүүтүгэр киириэ этибит диэн хас да судаарыстыба сайабылыанньа биэрбитэ. Мунньах бэбиэскэтигэр бу боппуруоһу көрүү өссө былырыыҥҥыттан киирбитэ. Саммикка барыта сүүрбэ тыһыынчаттан тахса кыттааччы кэлэрэ былааннанар.