Бу күннэргэ -50С кыраадыска диэри тымныйыа

Саха сиригэр дьыбардаах тоһуттар тымныылар түһүүлэрэ саҕаланна. Кэккэ улуустарга -50С кыраадыска тиийэ тымныйыа. Чугастааҕы күннэргэ хайдах күн-дьыл буолуоҕун туһунан Саха сиринээҕи Гидрометеорология уонна тулалыыр эйгэни кэтээн көрөр управление (УГМС) начаалынньыгын солбуйааччы — Гидрометкиин начаалынньыга Татьяна Маршалик кэпсээтэ.

«Салгын температурата түһүүтэ бастакынан хотугулуу-арҕаа уонна арҕаа улуустар олохтоохторо билиэхтэрэ. Номнуо бу күннэргэ түүнүн Өлөөн, Мииринэй уонна Ленскэй улуустарыгар салгын температурата -34…-39 С кыраадыска диэри түһүөҕэ, оттон сорох улуустарынан -40С кыраадыска тиийэ тымныйыа.

Өлөөн улууһугар, синоптиктар сабаҕалааһыннарынан, нэдиэлэ бүтүүтэ -45…-50С кыраадыска диэри тымныйыа. Өрөспүүбүлүкэ киин улуустарыгар күн-дьыл туруга өссө да улахан уларыйыыта суох турара бэлиэтэнэр, ол эрээри өрөбүллэргэ салгын температурата -34…-39С кыраадыска диэри түһүөҕэ.

Или эҥээр улуустарга салгын температурата -40С кыраадыска чугаһыа. Өрөспүүбүлүкэ бары сиригэр-уотугар кыралаан, сорох улуустарынан хаар түһэрэ күүтүллэр. Ордук күүстээхтик хаар Уус-Маайа улууһугар түһэрэ сабаҕаланар», — диэн Татьяна Маршалик кэпсээтэ.  Кини этэринэн субуотаҕа, сэтинньи 29 күнүгэр, Сахалин үрдүнэн ааһар циклон дьайыыта күүһүрэр. Бу Уус-Маайа улууһугар, ону тэҥэ хотугулуу-илиҥҥи улуустарга, ол иһигэр Өймөкөөн уонна Халыма-Индигиир оройуоннарыгар салгын температурата сорох-сорох сиринэн үрдүүрүгэр тиэрдиэн сөп.