Буойуннар чугас дьонноругар уордьаннары туттардылар

Олунньу 27 күнүгэр «Аҕа дойдуну көмүскээччилэр» пуондаҕа сырдык тыыннарын толук биэрбит буойуннар чугас дьонноругар «Хорсунун иһин» уордьаны, Суворов мэтээлин, о.д.а. үрдүк судаарыстыбаннай наҕараадалары туттарыы буолла.

«Аҕа дойдуну көмүскээччилэр» судаарыстыбаннай пуонда салаатын салайааччы Алексей Александров:

— Бүгүн биһиги пуондабыт СӨ байыаннай комиссариатын кытта бойобуой ытык иэстэрин толоро сылдьан, дьоруойдуу быһыыны көрдөрөн, тыыннарын толук уурбут буойуннарга уордьаннары, мэтээллэри туттарыахпыт. Хорсун дьоруойдары иитэн таһаарбыккыт иһин эһиэхэ махтанабыт, сүгүрүйэбит. Кинилэр ааттарын үйэтитэргэ биһиги бары үлэлиэхпит. Билигин Национальнай архыыбы кытта үлэлэһэ сылдьабыт. Эһиги туох баар боппуруостаргытын быһаарарга кыһаллыахпыт, — диэн эттэ.

Уордьаннары байыаннай хамыһаары солбуйааччы Алексей Рыжавскай туттартаата. Наҕараадалары буойуннар төрөппүттэрэ, кэргэттэрэ, оҕолоро туттулар. Сорохтор харахтарын уутун кыамматылар. Өлбүт буойуннары кэриэстээн, бары биир мүнүүтэ саҥата суох турдулар.

Ол курдук, бэрэсидьиэн ыйааҕынан, «Хорсунун иһин» уордьаны, Суворов мэтээлин Александр Степанов, Михаил Федореев, Николай Неустроев, Федор Суздальцев, Александр Фролов, Виктор Тетелев, Андрина Барашков, Александр Шалагин, Михаил Иванов, Александр Жданов, Андрей Чудаев, Геннадий Шадрин, Евгений Апросимов, Сергей Цынзак, Андрей Марков, Аполлон Процюк чугас дьоно туттулар.