Буокка сыаната үрдүөҕэ

РФ Үбүн министиэристибэтэ испиир уонна үрдүк кыраадыстаах итирдэр утахтар сыаналарын уларытар туһунан бирикээстэри бэлэмнээтэ.

Бирикээс барыллара нэһилиэнньэ дьүүлүгэр нуормалыыр-быраап аахталарын бырайыактарын федеральнай порталыгар таҕыста.

Холобур, 0,5 лиитэрэ бытыылкалаах буокка атыыга муҥутуур кыра сыанатын 281-тэн 299 солк., оттон коньяк арыгы 517-тэн 556 солк. диэри, бренди арыгы 375-тэн 403 солк. диэри улаатыннарарга этиллэр. Ону сэргэ биэдэмистибэ саамай кыра сыананы олохтуур арыгы утахтарын испииһэгэр ром арыгыны киллэрэргэ быһаарда. Ол курдук, ром арыгы 403 солк. итэҕэһэ суох атыыланыаҕа. Билигин атыыга бигэргэммит сыаната олохтоммотоҕо биллэр.

РФ Үбүн министиэристибэтэ быһаарыытынан, итирдэр утахтар сыаналарын уларытыы инфляция таһымын кытта сибээстэнэр, ону кытта арыгы бородууксуйатыгар 9 бырыһыан ыстаапкатын үрдэтиинэн  уонна  оҥорон таһаарыы ороскуота улаатыытынан.

Итини кытта атын бирикээс бырайыагынан аска-үөлгэ туттуллубат этиловай испиир сыанатын 1 лиитэрэҕэ 51- тэн 55 солк. диэри, оттон атын этиловай испиирдэргэ 68-тан 73 солк. диэри улаатыннарарга этиллэр. Мантан инньэ бирикээстэри чопчу бигэргэттэхтэринэ, итирдэх утахтар сыаналара бу сыл бэс ыйын 1 күнүттэн уларыйыаҕа.

Билигин киин куорат арыгы атыылыыр маҕаһыыннарыгар 0,5 лиитэрэ бытыылкалаах буокка ортотунан 340 солк., оттон биир лиитэрэлээх  700 солк. атыыланар.