«Бутлегер» тэрээһин түмүгүн таһаардылар

Полиция үлэһиттэрэ «Бутлегер»  сэрэтэр-профилактическай тэрээһини ыыттылар. Рейдэ кэмигэр арыгыны сокуону кэһэн атыылыыр 112 буруйу оҥорууну быһаардылар, 9 холуобунай дьыалаҕа майгынныыр бэлиэлэри буллулар.

Тэрээһиҥҥэ уопсайа 755 полиция үлэһитэ кытынна, онтон 500-тэн тахсата – учаастактааҕы боломуочунайдар. Ону таһынан, рейдэлэргэ хонтуруоллуур уорганнар уонна уопсастыбаннай холбоһуктар бэрэстэбиитэллэрэ кытыннылар. Рейдэ кэмигэр арыгы атыылыыр 186 аралдьытар-күүлэйдиир тэрилтэни уонна эргиэн эбийиэгин бэрэбиэркэлээтилэр.

Түмүгэр РФ Административнай кэһиилэр тустарынан кодексатын 14.1, 14.2, 14.16 (ч. 2.1), 14.17 уонна да атын ыстатыйаларынан 112 дьыаланы арыйдылар. Итини таһынан, полицейскайдар РФ Холуобунай кодексатын 171.4 ыстатыйатынан (арыгыны хос атыылааһын) уонна да атын ыстатыйаларынан 9 буруйу оҥоруу бэлиэлэрин быһаардылар. Рейдэ кэмигэр гражданнары кытта сэрэтэр кэпсэтиилэр ыытылыннылар, 500-тэн тахса официальнай сэрэтии бэрилиннэ. Тэрээһин түмүгүн таһаарыыга, үрдүк көрдөрүүнү ситиспит Ис дьыала уорганнарын 12 территориальнай салаатын бэлиэтээтилэр. Кинилэр истэригэр: Алдан, Бүлүү, Горнай, Ленскэй, Мэҥэ Хаҥалас, Мииринэй, Нерюнгри, Өлүөхүмэ, Сунтаар, Уус Алдан, Чурапчы оройуоннарын уонна Дьокуускай куорат полициятын салаалара киирдилэр.

Өрөспүүбүлүкэ киин куоратыгар ИДьМ управлениетын 2 №-дээх полиция отделын учаастактааҕы боломуочунайдара ордук түмүктээхтик үлэлээбиттэрин бэлиэтииллэр, диэн иһитиннэрэр  ИДьМ пресс-сулууспата.