Быдан былыргыга уонна тыыннаах айылҕаҕа айан

Бу күннэргэ Дьокуускай куорат 12 №-дээх оскуолатын бэһис “Г” кылааһын үөрэнээччилэрэ алын кылаастар учууталлара, “Майаҕатта суолунан” эспэдииссийэ салайааччыта Марианна Михайловна Петрова уонна бэһис “Г” кылаас салайааччыта Шкулева Надежда Ивановна салалталарынан бэрт интэриэһинэй тэрээһиҥҥэ баран кэллилэр.

Эспэдииссийэ кыттыылаахтара Хаҥалас улууһун Нөмүгү нэһилиэгэр тиийэн, аатырбыт Тыгын Дархан олорбут сиринэн сырыттылар.

“Оҕолору биллэр учуонай уонна педагог Прокопий Ноговицын көрүстэ, — диэн кэпсиир төрөппүт Чэмэлиинэ Скрябина. – Кини оҕолорго динозаврдар, сэлиилэр олорбут кэмнэрин туһунан кэпсээтэ, урукку эспэдииссийэлэртэн булбут ураты булумньуларын көрдөрдө – кыыллар таастыйбыт тобохторун, бизон тииһин, сэлии уҥуохтарын. Оҕолор маны наһаа интэриэһиргээтилэр”.

Түмэли көрөн баран эспэдииссийэ кыттыылаахтара Ис Бүтэй диэн сиргэ бардылар. Манна үөрэнээччилэр сири-буору чинчийдилэр, былыргы кэмтэн хаалбыт маллары буллулар: холобур, XIX–XX үйэтээҕи Кузнецовскай собуокка оҥоһуллубут фарфор иһит тобохторун. Вадим Константинов дьикти оһуордаах туой иһит тобоҕун булан, ойууну бүтүннүү таҥан таһаарар буолла. Бэчээттээх ботуруоннар көһүннүлэр, олор хантан кэлбиттэрин эмиэ салгыы үөрэтии турда. Археолог буола сылдьан оҕолор бастакы арыйааччы буолар үөрүүтүн биллилэр, бэл биир оҕо ураты ойуулаах ооҕуй оҕуһу булан ылла.

“Эллэйаада” оҕолоро экспонаттарга туйгун билиилээхтэрин көрдөрдүлэр:

Төрдүс кылаас үөрэнээччитэ Проня Ноговицын ботаникаҕа интэриэстээх, сэдэх үүнээйилэри көрдүүр.

Алтыс кылаас үөрэнээччитэ Эрсан Титов палеонтологияҕа дириҥ билиилээҕин көрдөрдө.

Сэттис кылаас үөрэнээччитэ Айсен Борисов орнитологиянан дьарыктанар.

Ньургун Третьяков (8 кылаас) тыа хаһаайыстыбатыгар уонна үгэс буолбут дьарыктарга билиитинэн сөхтөрдө.

Эдэр орнитолог Мичил Ноговицын биһиги оҕолобутун биологияҕа билиитинэн салыннарда.

“Ол да буоллар биһиги оҕолорбут сорудахтары толордулар, физикаҕа, химияҕа, литератураҕа, сорохтор ядернай физикаҕа дириҥ билиилээхтэрин көрдөрдүлэр”, — диэн эспэдииссийэ салайааччылара киэн тутта кэпсээтилэр. – Кэлэктиип аатыттан “Эллэйаада” эспэдииссийэтин салайааччыта Прокопий Романовичка, тэрээһини тэрийиигэ кыттыспыт оҕолорго — Проня Ноговицыҥҥа, Эрсан Титовка, Айсен Борисовка, Ньургун Третьяковка, Мичил Ноговицыҥҥа махталбытын биллэрэбит”.

Маннык бэртээхэй айаннартан төрөөбүт сирдэрин үөрэтиэн, билиэн-көрүөн баҕарар ыччаттар үүнэн тахсаллар. Бу ылбыт билиилэрэ оҕолор сүрэхтэрин сылааһынан угуттуу сылдьарыгар эрэнэбит.