Бүгүн Арассыыйа үрдүнэн күүстээх магнитнай буурҕа түһэр

Бүгүн, ыам ыйын 28 күнүгэр, ИКИ уонна СИЗИФ РАН учуонайдара иһитиннэрбиттэринэн, сиргэ күүстээх магнитнай буурҕа түһэр.

Эспиэрдэр бу күннэргэ төбө ыалдьарын,  хаан баттааһына уларыйарын сэрэттилэр.

Санаттахха, ыам ыйын 24-27 күннэригэр Күҥҥэ улахан эстиилэр буолбуттара. Барыта 23 эстии бэлиэтэммит, ол иһигэр биир саамай муҥутуур улахан X кылаастаах, уонна түөрт M орто кылаастаах эстиилэр буолбуттар. Күҥҥэ эстиилэр Күн арҕаа өттүгэр бэлиэтэммиттэр. Ордук бу өттүгэр тахсыбыт Күн эстиилэрэ Сиргэ дьайыылара күүстээх буолар диэн учуонайдар быһаараллар.

Күн астрономиятын лабораториятын чахчыларынан:

• — магнитнай буурҕа түһэрэ сабаҕаланара — 51% (үрдүк);
• — Сиргэ геомагнитнай дьайыылар күүһүрүүтэ сабаҕаланара — 35% (орто);
• — күн дьайыыта тохтуура сабаҕаланара — 14% (кыра).

Сарсыарда 6.00 чаастан магнитнай буурҕа таһыма үс баалтан биэс баалга диэри үрдүүр. Оттон сарсыарда 10:00 чааска биэс баалы куоһаран, муҥутуур кыһыл таһымҥа тиийэр. Буурҕа күн аҥаарыттан күүскэ дьайар, онтон кыралаан мөлтүүр. Күнүс 15:00 чааска үс баалга диэри намтыыра күүтүллэр — күөх таһымҥа чугаһыыр. Салгыы сыыйа сүтэр.

Магнитнай буурҕа кэмигэр элбэх ууну иһэр наада. Күүстэх үлэттэн аккаастанаргыт ордук. Кофе уонна арыгы иһэр көҥүллэммэт — сүрэх ноҕуруускатын үрдэтэр. Үчүгэйдик утуйуҥ, дьиэни салгылатыҥ, күлүккэ олорон сынньаныҥ, эми-тому чугас илдьэ сылдьыҥ диэн быраастар сүбэлииллэр.