Бүгүн биир кэлим эксээмэҥҥэ Бүтүн Арассыыйатааҕы эрчиллэр тэрээһин буолар

Бүгүн дойду 86 эрэгийиэнигэр уонна кыраныысса таһынааҕы үөрэх тэрилтэлэригэр Бүтүн Арассыыйатааҕы эрчиллэр тэрээһини ыыталлар.

Тэрээһин түөрт биридимиэккэ ыытыллар: биологияҕа, аангылыйа тылыгар (суругунан чааһа), аангылыйа тылыгар (тылынан чааһа), информатика көмпүүтэргэ көрүҥэр (КЕГЭ). Манна барыта 230 тыһ. тахса киһи кыттыаҕа. Уопсайа 5 тыһ. эксээмэн тутар пуун тэриллиэҕэ. Бу туһунан тургутан көрөр федеральнай киин иһитиннэрэр.

Биология биридимиэтин 138 тыһ. тахса киһи талбыт. Иккис миэстэҕэ 51 тыһ. кыттааччылаах информатика көмпүүтэргэ көрүҥэ буолар. Аангылыйа тылын суругунан чааһын 24 тыһ. тахса, оттон тылынан чааһын 18 тыһ. тахса киһи туттарыаҕа.

Тустаах тэрээһин эксээмэн ыытар пууннар тиэхиньиичэскэй өттүнэн бэлэмнэрин, эксээмэн буолуутугар тэрийээччилэр уонна тиэхиньиичэскэй исписэлиистэр үлэлэрин көрүүгэ туһаайыллар. Оскуола үөрэнээччилэригэр эксээмэн хайдах барарын көрөллөрүгэр уонна билиилэрин тургуталларыгар бэрт түгэн буолар.