Бүгүн өрөспүүбүлүкэ Ытык аҕаларын эҕэрдэлээтилэр

Быйыл Саха Өрөспүүбүлүкэтигэр Ийэ күнүн уонна Арассыыйа Федерациятыгар Аҕа күнүн бэлиэтээһин биир күҥҥэ – алтынньы үһүс баскыһыанньатыгар тэҥҥэ  түбэстилэр.

Алтынньы 18 күнүгэр Бырабыыталыстыба 2 нүөмэрдээх дьиэтигэр Саха Өрөспүүбүлүкэтигэр Ийэ күнүгэр уонна Арассыыйа Федерациятыгар Аҕа күнүгэр аналлаах үөрүүлээх тэрээһиҥҥэ өрөспүүбүлүкэ бастыҥ ийэлэрин уонна аҕаларын эҕэрдэлээтилэр.

СӨ бырабыыталыстыбатын бэрэссэдээтэлин солбуйааччы Георгий Степанов:

“Биһиги  өрөспүүбүлүкэбитигэр бэлиэтэнэр Ийэ уонна Аҕа күннэрин хайыы үйэ дьиэ кэргэн үгэс буолбут сыаннастарын харыстыырга ыҥырыы курдук ылынабыт. Кэнники сылларга элбэх оҕолоох дьиэ кэргэттэри өйүүргэ үгүс ахсааннаах дьаһаллар ылыллаллар. РФ Бэрэсидьиэнэ Владимир Путин көҕүлээһининэн 2025 сылтан “Дьиэ кэргэн” национальнай бырайыак үлэлиэҕэ.  Биһиги өрөспүүбүлүкэбит дьиэ кэргэҥҥэ кыһамньылаах сыһыанынан мэлдьи киэҥни биллэр, биһирэнэр. Биллэрин курдук, биһиги өрөспүүбүлүкэбит дойдуга бастакынан Ийэ күнүн олохтообута. Аҕа уонна ийэ уолларын быһыытынан эттэхпинэ, биһиги хас биирдиибит төрөппүттэрбитигэр махталлаах, ытыктабыллаах сыһыаннаах буолуохтаахпыт, бу барыта биһиги хааммытыгар баар”, — диэн  эҕэрдэтин тириэртэ.

Бу  күн оҕолору иитиигэ улахан өҥөлөрүн уонна  өрөспүүбүлүкэ уопсастыбаннай олоҕор улахан кылааттарын иһин “”Ытык аҕа” бэлиэнэн наҕараадаланнылар:

-Лукин Дмитрий Константинович – Чурапчы улууһун Үрүҥ Күөл сэлиэнньэтин ытыктабыллаах олохтооҕо, 13 оҕо аҕата, 17 сиэн уонна 26 хос сиэн эһээтэ, тыыл уонна үлэ бэтэрээнэ, СӨ бочуоттаах кырдьаҕаһа.

Харлампьев Павел Михайлович – Бүлүү улууһун Тааһаҕар сэлиэнньэтин бочуоттаах олохтооҕо, 5 оҕо аҕата, 15 сиэн эһээтэ.

Илюхин Виталий Александрович –Горнай улууһун Орто Сурт сэлиэнньэтин олохтооҕо,  8 оҕо аҕата, уопсастыбанньык, урбаанньыт уонна настаабынньык.

СӨ Үлэҕэ уонна социальнай сайдыыга министиэристибэтэ иһитиннэрбитинэн, “Ытык аҕа” бочуоттаах бэлиэни ылбыт аҕаларга 100 тыһыынча солкуобай бэриллэр. Ил Дархан Айсен Николаев ыйааҕынан, быйылгыттан ыла маннык бэлиэнэн сылга алталыы аҕа (урут 3 этэ) бэлиэтэниэҕэ.

Ону сэргэ, үрдүк наҕараадаларынан бэлиэтэннилэр:

“Саха Өрөспүүбүлүкэтин үтүөлээх бырааһа” үтүөлээх аатынан  – аллерголог-иммунолог быраас Мария Дмитриевна Карымова;

СӨ Ил Дарханын Грамотатынан —  “Сардаана” фирма ыскылаатын сэбиэдиссэйэ Татьяна Александровна Потапова,  “Полярные авиалинии” АХ” ыстаарсай бортмеханига Сергей Николаевич Луканов;

“Гражданскай килбиэн” бэлиэнэн —  “Возрождение” уопсастыбаннай тэрилтэ бэрэссэдээтэлэ Азияна Филипповна Харлампьева;

Ил Дархан Махтал суругунан —  “Свет-Сырдык” пуонда ситэриилээх дириэктэрэ Александр Русланович Иванов;

СӨ Бырабыыталыстыбатын Грамотатынан “Резерв” өрөспүүбүлүкэтээҕи мэдиссиинэ киинин 1 нүөмэрдээх эбийиэгин ыскылаатын сэбиэдиссэйэ Лидия Макаровна Соколова;

СӨ Бырабыыталыстыбатын Махтал суругунан СӨ Национальнай бибилэтиэкэтин докумуоннар пуондаларын отделын сүрүн бибилэтиэкэрэ Раиса Романовна Ощепкова.

Наҕараадаламмыттары уонна ыҥырыылаах ыалдьыттары  “The Angels”  оҕо вокальнай бөлөҕө  уонна Судаарыстыбаннай филармония солиһа,  аан дойдутааҕы уонна Бүтүн Арассыыйатааҕы куонкурустар лауреаттара Алексей Солдатов ылбаҕай ырыаларынан эҕэрдэлээтилэр.