Бүгүн Сиэйэ Уолун төрөөбүт күнэ (ВИДЕО)

Бүгүн саха тапталлаах ырыаһыта Виктор Иванов-Сиэйэ Уолун төрөөбүт күнэ.

Сиэйэ Уола төрөөбүт күнүн иннинэ Владивосток куоракка ырыа кэһиилээх тиийэ сырытта.
Сунтаар дьоно-сэргэтэ  Владивосток куоракка сулууспалыыр Саха сирин  уолаттарыгар анаан ыыппыт ыһыахтарыгар күндү ыалдьытынан буолла. Элбэх ырыатын бэлэхтээн, саллааттар уонна ыалдьыттар махталларын ылла. Онтон сахалыы толору симэммит «Воин» диэн ааттаах сүүрүк атынан тахсан, суруйааччы Афанасий Гуринов-Арчылан тылларыгар уонна бэйэтин  матыыбыгар «Алакы» диэн ырыатын толорбута, дьонун-сэргэтин уруйдаабыта-айхаллаабыта ыһыах биир умнуллубат түгэнинэн буолла.

Виктор, «Киһи кэрэни, сырдыгы ыраланан көрүөхтээх. Биһиги ортобутугар үтүө санаалаах дьон олус элбэх. Кинилэр  эйиэхэ үчүгэйи эрэ баҕарар биир тыллара киһини кынаттыыр», – диэн  интервьюгар эппиккинии, төрөөбүт күҥҥэр этиллэр эҕэрдэ, алгыс тыллара эйиэхэ суолдьут сулус буола турдуннар.

Быһаарыы:

Виктор Иванов-Сиэйэ Уола -– СӨ култууратын туйгуна, Сунтаар улууһун Сиэйэ нэһилиэгин бочуоттаах олохтооҕо. М.К.Аммосов аатынан Саха судаарыстыбаннай университетыгар «Культуролог» идэтин бүтэрбитэ. 2006 сылтан СӨ норуодунай артыыһа Аркадий Алексеев айар бөлөҕөр киирбитэ.
Виктор Иванов -– «Туой Хайа» куонкурус II истиэпэннээх лауреата, «Саҥа ырыа» мусукаалынай куонкурус кыайыылааҕа, «Этигэн» хомус хас да төгүллээх номинана, Москваҕа «Единство России» Бүтүн Арассыыйатааҕы куонкурус, Стамбулга эдэр ырыаһыттар аан дойдутааҕы куонкурустарын Гран-приларын хаһаайына, «Хит года» куонкурус кыайыылааҕа, «Өбүгэм алааһа» ырыатынан «Клипмейкер» куонкурус, «Үрдэл» бириэмийэ  кыайыылааҕа уо.д.а.