Бүгүн Алексей Еремеев салайааччылаах Ил Түмэн оробуочай бөлөҕө Аммаҕа үлэтин саҕалаата

Бүгүн, олунньу 11 күнүгэр, Ил Түмэн Судаарыстыбаннай Мунньаҕын спикера Алексей Еремеев, сис кэмитиэттэр бэрэссэдээтэллэрэ Александр Атласов, Владимир Прокопьев, Александр Корякин кыттыылаах оробуочай бөлөҕө Амма улууһуттан үлэлэрин саҕалаатылар.

Дьокутааттар нэһилиэнньэни кытта көрсүһүүлэрэ төгүрүк остуол тула олорон, 2025 сылтан аһы-үөлү оҥоруу сүрүн хайысхаларын улуустар бэйэлэрэ быһааралларыгар боломуочуйа бэриллибитинэн киириэхтээх мэхэниисимнэр тустарынан  саҥа сокуон олоххо киириитин тула кэпсэтииттэн саҕаланна. Кэпсэтиигэ тыа хаһаайыстыбатын салаатын өйүүргэ ханнык хайысхалары сайыннарар тоҕоостооҕун, бу салаа сайдыытын харгыстыыр кыһалҕалары, бородууксуйаны батарыыны, миэстэтигэр оҥорон таһаарыы, сир боппуруостарын туһунан дьүүллэстилэр. Маны сэргэ, ыһыы үлэтин тэнитиини, үүнээйини үрдэтии, сиэмэни атыылаһыы уустуктарын, мелиорация, нүөлсүтүү боппуруостарын эмиэ таарыйдылар.

Нэһилиэк баһылыктара, тыа хаһаайыстыбатын тэрээһиннээх уонна бааһынай хаһаайыстыбаларын салайааччылара, бу салаа исписэлиистэрэ атах тэпсэн олорон дьокутааттарга долгутар ыйытыыларын биэрдилэр, эппиэттэри иһиттилэр. Олохтоохтор оттуур ходуһалары туһаҕа таһаарыыга сыһыаннаах сокуон наадатын туһунан, нолуок ирдэбиллэрин тула бэйэлэрин санааларын этиннилэр. Маны таһынан, үүккэ көрүллэр үп-харчы үрдүүрүгэр, тыа сиригэр исписэлиистэри олохсутууну тула, о.д.а. тыа сирин тутаах боппуруостарыгар болҕомторун туһаайдылар. Тэриллиилээх хаһаайыстыбалар салайааччылара сэлээркэ ыараан, үлэҕэ-хамнаска охсорун этэн туран, көрүллэр өйөбүл кээмэйэ үрдүүрүгэр баҕа санааларын тиэртилэр.

Ону сэргэ, эдэр дьону тыа сиригэр, үлэҕэ-хамнаска чугаһатар туһугар сөптөөх усулуобуйаны тэрийэргэ тыа сиригэр улахан болҕомто ууруллуон наада диэн үгүс киһи ыйда. Аммалар онно аналлаах, тыа сирин өрө тардарга бары хайысхалары туһанан сонун мэхэньиисимнэри тобулуохха диэн дьокутааттары ыҥырдылар.

Салгыы дьокутааттар «Ыраас уу» федеральнай бырагыраама өйөбүлүнэн былырыын үлэҕэ киирбит  ууну ыраастыыр ыстаансыйа үлэтин билистилэр. Ыстаансыйа сууккаҕа 1500 куб ууну ыраастыыр кыамталаах. Манн барыта  16 киһи үлэлиир. Эбийиэк иккис түһүмэҕэр туһанааччыларга дьиэлэригэр диэри ситими тардар сорук турар.

Эбиэттэн киэһэ дьокутааттар тыа хаһаайыстыбатын тэрилтэлэринэн сырыттылар, Абаҕаҕа, Сулҕаччыга тахсан сылгы баазатыгар сылдьан сылгыһыттары, сүөһү көрөөччүлэри кытта көрсөн кэпсэттилэр.  Абаҕа нэһилиэгэр дьокутааттар Амма улууһун биир бөдөҥ хаһаайыстыбатыгар «Илгэҕэ»  сырыттылар. Хаһаайыстыба 300-тэн тахса ыанар ынахтаах. Дириэктэр Василий Тимофеев үлэ өссө тэнийиэн үлэһит илии тиийбэт буолан толору кыаҕынан барбат диэн эттэ.

Сайын сүөһүлэрэ элбэх буолан икки  пиэрмэнэн тарҕанан үлэлииллэр. Амма өрүс уҥуор өттүгэр субаннар сайылыыр сирдэрэ баар.  Дэриэбинэ таһыгар ньирэй көрөллөр. Маны таһынан хаһаайыстыба 600 сылгыны тутар. Дьокутааттар улуус биир бөдөҥ хаһаайыстыбата үүт-ас, бэйэ этэ, аһа дэлэйэригэр сүдү үлэни ыытарын бэлиэтээтилэр уонна үлэһиттэр тыа хаһаайыстыбата салгыы сайдыытыгар туох санаалаахтарын  иһиттилэр.

Мантан киэһэ дьокутааттар Чурапчыга айанныахтара.

Ил Түмэн пресс-сулууспата. 

Василий Кононов хаартыскаҕа түһэриилэрэ.